പംഗയിലെ കബഡി താരത്തിന് ശേഷം, വ്യോമസേനയിലെ പൈലറ്റായി കങ്കണ റണാവത് അഭിനയിക്കുന്ന തേജസ് എന്ന ചലച്ചിത്രത്തിലെ ഫസ്റ്റ് ലുക്ക് പോസ്റ്റർ പുറത്തിറങ്ങി. റോണി സ്ക്രൂവാല നിർമ്മിക്കുന്ന ചിത്രത്തിന്റെ സംവിധാനം നിർവഹിക്കുന്നത് സർവ്വേശ് മേവാരയാണ്.
രാജ്യത്തിനു വേണ്ടി ത്യാഗം ചെയ്ത യൂണിഫോമണിഞ്ഞ ശക്തരായ സ്ത്രീകൾക്ക്, ആദരപൂർവ്വം ഈ ചിത്രം സമർപ്പിക്കുന്നുവെന്ന് കങ്കണ തന്റെ ഇൻസ്റ്റഗ്രാം അക്കൗണ്ടിലെഴുതി. സായുധ സേനകളോട് ചെറുപ്പം മുതലേ ഉണ്ടായിരുന്ന അഭിനിവേശം കാരണം, എന്നെങ്കിലും ഒരു സൈനിക വേഷം ചെയ്യണമെന്ന തന്റെ ആഗ്രഹമാണ് സഫലമായതെന്നും കങ്കണ കൂട്ടിച്ചേർത്തു. അടുത്തവർഷം ഏപ്രിലോടു കൂടിയാണ് ചിത്രത്തിന്റെ റിലീസ് പ്രതീക്ഷിക്കുന്നത്. ഇന്ത്യൻ വ്യോമസേനയിലെ മിടുക്കന്മാരായ പൈലറ്റുകൾക്കുള്ള സമർപ്പണമാണ് ചിത്രമെന്ന് നിർമ്മാതാവായ റോണിയും പത്രസമ്മേളനത്തിൽ അറിയിച്ചു.
