“പാകിസ്ഥാനുമായി സൗഹൃദമല്ലാതെ ഇന്ത്യയൊരിക്കലും യുദ്ധം ആഗ്രഹിക്കുന്നില്ല” : നാളെ യുദ്ധം തുടങ്ങുമെന്ന രീതിയിൽ വാർത്ത പടച്ചുവിടുന്ന ഇന്ത്യയിലെ ചില മാധ്യമങ്ങളാണ് പ്രശ്നക്കാരെന്ന് ഷോയിബ് അക്തർ

പാക്കിസ്ഥാനുമായി ഇന്ത്യ ഒരിക്കലും യുദ്ധം ആഗ്രഹിക്കുന്നില്ലെന്ന് മുൻ പാക് ക്രിക്കറ്റ് താരം ഷോയിബ് അക്തർ. ഇന്ത്യക്കാർ വളരെ നല്ലവരാണെന്നും സമാധാനപ്രിയരാണെന്നുമാണ് അക്തർ അഭിപ്രായപ്പെട്ടത്.

മുൻ ഫാസ്റ്റ് ബൗളറായ ഷോയിബ് അക്തർ വിരമിച്ചതിനുശേഷം ഇന്ത്യയിൽ കമന്റേറ്ററായി ഒരുപാടു കാലം സേവനമനുഷ്ഠിച്ചിട്ടുണ്ട്. അതു കൊണ്ടു തന്നെ ഭാരതീയരെ തനിക്ക് നല്ല പോലെയറിയാമെന്നും അദ്ദേഹം അവകാശപ്പെടുന്നു.എന്നാൽ, ഇന്ത്യയിലെ ചില മാധ്യമങ്ങൾ മഹാ പ്രശ്നക്കാരാണെന്നും, നാളെ കാലത്തു തന്നെ യുദ്ധം ആരംഭിക്കുമെന്നു തോന്നിക്കുന്ന രീതിയിലാണ് അവരുടെ റിപ്പോർട്ടിങ്ങെന്നും അക്തർ പറഞ്ഞു.ഇന്ത്യ മഹത്തായ ഒരു രാജ്യമാണെന്നും പാകിസ്ഥാനുമായി ഏതെങ്കിലും വിധത്തിലുള്ള പ്രശ്നം ഇന്ത്യക്കാർ ആഗ്രഹിക്കുന്നതായി തനിക്കിതു വരെ തോന്നിയിട്ടില്ലെന്നും അക്തർ വെളിപ്പെടുത്തി