ഡൽഹി: ഇന്ത്യയിൽ കൊവിഡ് 19 രോഗബാധിതരുടെ എണ്ണം 873 ആയെന്ന് കേന്ദ്ര ആരോഗ്യ- കുടുംബക്ഷേമ മന്ത്രാലയം. രോഗബാധയെ തുടർന്ന് ഇന്ന് മരിച്ച മലയാളിയടക്കം ആകെ മരണസംഖ്യ 19 ആയി. അതേസമയം 78 പേർ രോഗം ഭേദമായതിനെ തുടർന്ന് ആശുപത്രി വിട്ടതായും കേന്ദ്രം അറിയിച്ചു.
മഹാരാഷ്ട്രയിലാണ് നിലവിൽ ഏറ്റവും കൂടുതൽ രോഗബാധിതർ ഉള്ളത്. 180 പേർക്കാണ് ഇവിടെ രോഗം സ്ഥിരീകരിച്ചിരിക്കുന്നത്. തൊട്ടു പിന്നിലുള്ള കേരളത്തിൽ രോഗബാധിതരുടെ എണ്ണം 173 ആണ്. മഹാരാഷ്ട്രയിൽ 25 പേരും കേരളത്തിൽ 11 പേരും രോഗമുക്തി നേടി.
കേരളത്തിൽ മട്ടാഞ്ചേരി സ്വദേശിയായ 69കാരനാണ് കൊവിഡ് ബാധിച്ച് മരിച്ചത്. ഇദ്ദേഹം കളമശ്ശേരി മെഡിക്കൽ കോളേജ് ആശുപത്രിയിൽ ചികിത്സയിൽ ആയിരുന്നു. മാർച്ച് 16ന് ദുബായിൽ നിന്ന് നാട്ടിൽ തിരിച്ചെത്തിയതായിരുന്നു. മാർച്ച് 22നാണ് രോഗം സ്ഥിരീകരിച്ചത്. . തുടർന്ന് ഐസൊലേഷൻ വാർഡിലേക്ക് മാറ്റുകയായിരുന്നു. ഇദ്ദേഹത്തിന്റെ ഭാര്യയും കോവിഡ് രോഗത്തിന് ചികിത്സയിൽ ആണ്.രാവിലെ എട്ട് മണിക്കാണ് മരണം സംഭവിച്ചത്.
മരണാനന്തര ചടങ്ങുകൾ ഒഴിവാക്കി പൂർണമായും പ്രോട്ടോക്കോൾ അനുസരിച്ച് ഇദ്ദേഹത്തിന്റെ സംസ്കാരം നടത്തുമെന്ന് മന്ത്രി വി എസ് സുനിൽ കുമാർ അറിയിച്ചു. ആശങ്കപ്പെടേണ്ട സാഹചര്യം നിലവിലില്ലെന്നും മന്ത്രി വ്യക്തമാക്കി.
