ഭാരതത്തെ പിടിച്ചുകുലുക്കിയ കോവിഡ് മഹാമാരി രാജ്യത്തിന് പകർന്നു നൽകിയത് സ്വയംപര്യാപ്തതയെന്ന വലിയ പാഠമെന്ന് പ്രധാനമന്ത്രി നരേന്ദ്രമോദി.പഞ്ചായത്ത് രാജ് ദിനത്തിൽ, രാജ്യത്തെ ഗ്രാമമുഖ്യന്മാരുമായി വീഡിയോ കോൺഫറൻസിൽ സംവദിക്കുകയായിരുന്നു പ്രധാനമന്ത്രി.
രാജ്യത്തെ പഞ്ചായത്ത് തലത്തിൽ ശാക്തീകരിക്കുന്നതിനായി ഇ-ഗ്രാമസ്വരാജ്, സ്വമിത്വ എന്നീ പോർട്ടലുകളും ഇവയുടെ മൊബൈൽ ആപ്പും പ്രധാനമന്ത്രി അവതരിപ്പിച്ചു. ഡിജിറ്റൽ ആയ പഞ്ചായത്തുകളുടെ പ്രവർത്തനങ്ങൾ പുരോഗതിയുടെ വേഗം കൂട്ടും. പഞ്ചായത്ത് തലത്തിലുള്ള വികസന പദ്ധതികളുടെ കരട് രൂപം മുതൽ നടപ്പിലാക്കൽ വരെയുള്ള സകല വിശദാംശങ്ങളും ഇവ ഉപയോഗിച്ച് ജനങ്ങൾക്ക് അറിയാൻ സാധിക്കും.ഡ്രോണുകൾ ഉപയോഗിച്ച് ഓരോ ഗ്രാമത്തെയും നിരീക്ഷിക്കുമെന്ന് പറഞ്ഞ നരേന്ദ്രമോദി ഏറ്റവും അടിത്തട്ടിലുള്ള കരുത്തുറ്റ പഞ്ചായത്തുകൾ ജനാധിപത്യത്തിന്റെ വിജയത്തിന്റെ അടിസ്ഥാനഘടകമാണെന്നും വ്യക്തമാക്കി.
