വയനാട്: വയനാട് അനാഥാലയത്തില്‍ അന്തേവാസികളായ കുട്ടികളെ കടയിലേക്ക് വിളിച്ചു വരുത്തി മിഠായി നല്‍കി പീഡിച്ച കേസില്‍ പ്രതിക്ക് 15 വര്‍ഷം തടവ് ശിക്ഷയും എഴുപതിനായിരം രൂപ പിഴയും വിധിച്ചു. വയനാട് മുട്ടിലിലെ അനാഥാലയത്തില്‍ ഏഴ് കുട്ടികള്‍ പീഡിപ്പിക്കപ്പെട്ട കേസിലാണ് കല്‍പ്പറ്റ പോക്‌സോ കോടതി ശിക്ഷ വിധിച്ചത്. വിളഞ്ഞിപ്പിലാക്കല്‍ നാസറിനെ (42)യാണ് ശിക്ഷിച്ചത്.
സ്‌കൂളിലേക്ക് പോകുകയായിരുന്ന കുട്ടികളെ കടയിലേക്ക് വിളിച്ച് വരുത്തി മിഠായി നല്‍കി പ്രലോഭിപ്പിച്ച് പീഡനത്തിനിരയാക്കിയ ആദ്യ കേസിലാണ് ഇപ്പോള്‍ ശിക്ഷ വിധിച്ചത്. 11 കേസുകളിലായി ആറ് പ്രതികള്‍ കേസില്‍ ഉള്‍പ്പെട്ടിരുന്നു. ഇതില്‍ മുഖ്യപ്രതിയാണ് മുട്ടില്‍ സ്വദേശി വിളഞ്ഞിപ്പിലാക്കല്‍ നാസര്‍. വിചാരണ കാലയളവില്‍ പെണ്‍കുട്ടി കൂറുമാറിയിരുന്നെങ്കിലും സാഹചര്യ തെളിവുകളുടേയും ശാസ്ത്രീയ തെളിവുകളുടേയും അടിസ്ഥാനത്തിലാണ് ശിക്ഷ വിധിച്ചത്.
2017 മാര്‍ച്ചിലാണ് അനാഥാലയത്തിലെ അന്തേവാസികളായ ഏഴ് കുട്ടികള്‍ പീഡനത്തിനിരയായത്. സ്‌കൂളില്‍ ചൈല്‍ഡ് ലൈന്‍ നടത്തിയ കൗണ്‍സിലിംഗിനിടെയാണ് പീഡനത്തിനിരയായ വിവരം കുട്ടികള്‍ വെളിപ്പെടുത്തിയത്.ഇതുമായി ബന്ധപ്പെട്ട മറ്റ് പത്ത് കേസുകളില്‍ വിചാരണ നടക്കുകയാണ്.
Discussion about this post