ന്യൂഡൽഹി : പ്രധാനമന്ത്രി നരേന്ദ്രമോദിയുടെ ലഡാക്ക് സന്ദർശനത്തിൽ പരോക്ഷ പ്രതികരണവുമായി ചൈന. ഈ സാഹചര്യത്തിൽ നില വഷളാക്കുന്ന നടപടികൾ ആരുടെ ഭാഗത്തുനിന്നും ഉണ്ടാകരുതെന്ന് ചൈനീസ് വിദേശകാര്യ വക്താവ് സുവോ ലിജിയാൻ വ്യക്തമാക്കി.ഗാൽവൻ താഴ്‌വരയിലുണ്ടായ സംഘർഷത്തിനു പരിഹാരം കാണേണ്ടത് ചർച്ചയിലൂടെയാണെന്നും നയതന്ത്ര -സൈനീക തലങ്ങളിലുള്ള ചർച്ചകളാണ് വേണ്ടതെന്നും സുവോ ലിജിയാൻ കൂട്ടിച്ചേർത്തു.
ഇന്ന് രാവിലെയാണ് മുൻകൂട്ടി അറിയിപ്പുകളൊന്നും നൽകാതെ പ്രധാനമന്ത്രി നരേന്ദ്രമോദി ലഡാക്കിലേക്ക് അപ്രതീക്ഷിത സന്ദർശനം നടത്തിയത്.സംയുക്ത സേനാ മേധാവി ബിപിൻ റാവത്തും കരസേനാ മേധാവി ജനറൽ മനോജ്‌ മുകുന്ദ് നരവനെയും പ്രധാനമന്ത്രിയോടൊപ്പം ലഡാക്കിലെത്തിയിരുന്നു. ലഡാക്കിൽ നിന്നും നിമു സൈനിക പോസ്റ്റിലെത്തിയ പ്രധാനമന്ത്രി നരേന്ദ്രമോദി കരസേന, വ്യോമസേന, ഇൻഡോ ടിബറ്റൻ ബോർഡർ പോലീസ് എന്നീ വിഭാഗങ്ങളിലെ സൈനികരുമായി കൂടിക്കാഴ്ച നടത്തി.
