കൊഹിമ: നായമാംസത്തിന്റെ വിൽപ്പനയും ഇറക്കുമതിയും കച്ചവടവും നിരോധിച്ച് നാഗാലാൻഡ്. നായകളുടെ മാംസം വിൽക്കുന്നതോ മാംസത്തിനായി നായകളെ വിൽക്കുന്നതോ നായമാംസം പാചകം ചെയ്തതോ അല്ലാത്തതോ ആയ നിലയിൽ നാഗലാൻഡിലേക്ക് കടത്തുന്നതോ ആയ എല്ലാ പ്രവർത്തനങ്ങളും നിരോധിക്കുകയാണെന്ന് നാഗാലാൻഡ് ഗവണ്മെന്റ് പത്രക്കുറിപ്പിലൂടെ വ്യക്തമാക്കി.
നേരത്തേ മിസോറാം ഗവണ്മെന്റും സമാനമായ നിയമം പാസ്സാക്കിയിരുന്നു. മിസോറാം, നാഗാലാൻഡ് എന്നീ സംസ്ഥാനങ്ങളിലെ ചില ഭാഗങ്ങളിലുള്ളവർ നായമാംസം ഭക്ഷിയ്ക്കാറുണ്ട്. ഇതിനായി അയൽ സംസ്ഥാനങ്ങളിൽ നിന്ന് തെരുവുനായ്ക്കളെ പിടിച്ച് അനധികൃതമായി കടത്തുന്നത് വ്യാപകമാണ്. യാതൊരു നിയന്ത്രണവുമില്ലാതെ നടക്കുന്ന ഈ കച്ചവടത്തിൽ നായ്ക്കളെ അതിക്രൂരമായ രീതിയിലാണ് കൈകാര്യം ചെയ്യുന്നത്.
നാഗാലാൻഡിലെ ദിമാപൂരിലും അടുത്തുള്ള പട്ടണങ്ങളിലുമാണ് ഏറ്റവും കൂടുതൽ നായമാംസം വിറ്റഴിക്കപ്പെടുന്നത്. വർഷാവർഷം ഏകദേശം മുപ്പതിനായിരത്തോളം നായകളെയാണ് മാംസത്തിനായി നാഗലാൻഡിലേക്ക് കടത്തുന്നത്. നാഗലാൻഡിലെ എല്ലാ ജനങ്ങളും നായമാംസം ഭക്ഷിക്കാറില്ല. മിസോറാമിലേയും നാഗലാൻഡിലേയും ചില ഗോത്രവർഗ്ഗങ്ങളിലുള്ളവർ മാത്രമാണ് നായമാംസം ഭക്ഷിക്കുന്നത്.
“ഇങ്ങനെയൊരു തീരുമാനമെടുക്കുന്നതിൽ ഗവണ്മെന്റിന് അതിന്റേതായ കാരണമുണ്ടാകും. പക്ഷേ ഈ തീരുമാനം എങ്ങനെയാണവർ നടപ്പിലാക്കാൻ പോകുന്നത് എന്ന് മനസ്സിലാവുന്നില്ല”. നാഗാലാൻഡ് ഗോത്രവർഗ്ഗസമിതി അഭിപ്രായപ്പെട്ടു. “ഞാൻ നായകളെ ഇഷ്ടപ്പെടുന്ന ആളാണ്. അതുകൊണ്ടുതന്നെ അതിന്റെ മാംസം ഉപയോഗിക്കാറില്ല. പക്ഷേ ധൃതിപിടിച്ച് ഇങ്ങനെയൊരു തീരുമാനം എടുക്കുന്നതിനു മുൻപ് നായമാംസം ഉപയോഗിക്കുന്ന ഗോത്രവർഗ്ഗക്കാരെ ബോധവൽക്കരിക്കാൻ ഗവണ്മെന്റ് സമയം കണ്ടെത്തണമായിരുന്നു”. നാഗാലാൻഡിലെ പ്രശസ്ത ഗായകൻ അലൊബോ നാഗ അഭിപ്രായപ്പെട്ടു.
2020 മാർച്ചിൽ മിസോറാമും നായമാംസം വിൽക്കുന്നതിനേയും മാംസാവശ്യത്തിനു നായകളെ കച്ചവടം ചെയ്യുന്നതിനെയും നിരോധിച്ച് നിയമം പാസ്സാക്കിയിരുന്നു. അതിനു പുറമേയാണ് നാഗലാൻഡിലും നിരോധനം നടപ്പിലാക്കുന്നത്. നിയമം പാസ്സാക്കിയെങ്കിലും എന്ത് കാരണം കൊണ്ടാണ് ഈ നിരോധനം എന്ന് നാഗാലാൻഡ് സർക്കാർ വ്യക്തമാക്കിയിട്ടില്ല.
Discussion about this post