ഡൽഹി: രാജ്യത്ത് കൊറോണ വൈറസ് വ്യാപനം പടർന്നു പിടിക്കുന്ന സാഹചര്യത്തിൽ പ്രതിരോധ പ്രവർത്തനങ്ങൾ വിലയിരുത്തി പ്രധാനമന്ത്രി നരേന്ദ്ര മോദി. വൈറസ് വ്യാപനം ചെറുക്കുന്നതിനായി ദേശീയ തലസ്ഥാന മേഖലയിൽ സ്വീകരിച്ചതിന് സമാനമായ മാർഗ്ഗങ്ങൾ അവലംബിക്കാൻ അദ്ദേഹം സംസ്ഥാനങ്ങൾക്ക് മാർഗ്ഗ നിർദ്ദേശം നൽകി. രോഗവ്യാപനം തടയുന്നതിനായി പൊതു സ്ഥലങ്ങളില് സാമൂഹിക അകലം പാലിക്കേണ്ടതുണ്ടെന്നും വ്യക്തി ശുചിത്വം പ്രധാനമാണെന്നും പ്രധാനമന്ത്രി ഓർമ്മിപ്പിച്ചു.
വൈറസ് വ്യാപനം നിയന്ത്രിക്കുന്നതിനായി രാജ്യത്തിന്റെ വിവിധ ഭാഗങ്ങളില് സ്വീകരിച്ചിരിക്കുന്ന നടപടികൾ പ്രധാനമന്ത്രി വിലയിരുത്തി. ജനങ്ങളില് വൈറസ് ബാധയെ കുറിച്ചുള്ള അവബോധം സൃഷ്ടിക്കണമെന്നും പ്രധാനമന്ത്രി നിർദ്ദേശം നൽകി. രോഗത്തെ നേരിടുന്നതിൽ കേന്ദ്ര, സംസ്ഥാന, പ്രാദേശിക ഭരണകൂടങ്ങള് സ്വീകരിച്ച നടപടികളെ അദ്ദേഹം അഭിനന്ദിച്ചു.
വൈറസ് വ്യാപനം രൂക്ഷമായിരിക്കുന്ന സംസ്ഥാനങ്ങളില് പ്രതിരോധ പ്രവര്ത്തനങ്ങളും നിരീക്ഷണങ്ങളും പരിശോധനകളും കര്ശനമാക്കണമെന്ന് പ്രധാനമന്ത്രി യോഗത്തിൽ കർശന നിർദ്ദേശം നൽകി. കേന്ദ്ര ആഭ്യന്തര മന്ത്രി അമിത് ഷാ, ആരോഗ്യ വകുപ്പ് മന്ത്രി ഡോക്ടർ ഹർഷ വർധൻ, നീതി ആയോഗ് പ്രതിനിധി, ക്യാബിനറ്റ് സെക്രട്ടറി, കേന്ദ്രസർക്കാരിലെ വിവിധ വകുപ്പുകളിലെ പ്രതിനിധികൾ തുടങ്ങിയവർ യോഗത്തിൽ സംബന്ധിച്ചു.
Discussion about this post