ഉപഭോക്താക്കളുടെ അവകാശ സംരക്ഷണത്തിനായുള്ള പുതിയ ഉപഭോക്തൃ സംരക്ഷണ നിയമം ഇന്ന് നിലവിൽ വരും. 2019 ഇൽ പാർലമെന്റ് പാസാക്കിയ ഈ നിയമത്തിൽ ഉപഭോക്തൃ പ്രസ്ഥാനങ്ങൾക്ക് കൂടുതൽ കരുത്ത് പകരാൻ കെൽപ്പുള്ള വ്യവസ്ഥകളാണ് എഴുതി ചേർത്തിട്ടുള്ളത്. പുതിയ ഉപഭോക്തൃ സംരക്ഷണ നിയമത്തിൽ ഓൺലൈൻ വ്യാപാരം കൂടി ഉൾപ്പെടുത്തിയിട്ടുണ്ട്. പുതിയ ഉപഭോക്തൃ സംരക്ഷണ നിയമത്തിലെ 2(7) വകുപ്പിലാണ് ഇലക്ട്രോണിക് മാധ്യമത്തിലൂടെയുള്ള വ്യാപാരങ്ങൾ, ടെലി ഷോപ്പിംഗ്, ഡയറക്ട് മാർക്കറ്റിംഗ്, മൾട്ടിലെവൽ മാർക്കറ്റിംഗ് എന്നിവ വ്യക്തമാക്കിയിട്ടുള്ളത്. ഇതോടെ ഓൺലൈൻ വ്യാപാര മേഖലയെ സംബന്ധിച്ച പരാതികൾ പരിഹരിക്കാൻ ഉപഭോക്തൃ കമ്മീഷനുകൾക്ക് അധികാരം ലഭിക്കും. മാത്രമല്ല, ജില്ലാ ഉപഭോക്തൃ തർക്ക പരിഹാര ഫോറത്തിന്റെ പേര് കമ്മീഷൻ എന്നാക്കി മാറ്റിയിട്ടുണ്ട്.
