ഇടുക്കി രാജമലയില് ഉരുള്പൊട്ടലുണ്ടായതിനെ തുടര്ന്ന് പെട്ടിമുടി തോട്ടം മേഖലയില് വന് മണ്ണിടിച്ചിൽ. പെട്ടിമുടി സെറ്റില്മെന്റിലെ ലായങ്ങള്ക്ക് മുകളിലേക്ക് മണ്ണിടിഞ്ഞ് വീണ് 20 പേര് കുടുങ്ങിയെന്നും സ്ഥിരീകരിക്കാത്ത റിപ്പോര്ട്ടുണ്ട്. ഇന്ന് പുലര്ച്ചെ രണ്ട് മണിയോടെയാണ് അപകടമുണ്ടായത്.
അഞ്ച് പേരെ മണ്ണിനടിയില് നിന്ന് പുറത്തെടുത്തതായാണ് ലഭിക്കുന്ന വിവരം. രണ്ട് പേരെ മൂന്നാറിലെ ടാറ്റ ആശുപത്രിയില് എത്തിച്ചു. പെരിയവര പാലം തകര്ന്നിരിക്കുന്നതിനാല് ആളുകളെ ചുമന്നാണ് പുറത്തേക്ക് എത്തിക്കുന്നത്.
മൂന്ന് ലൈനുകളിലായി 84 പേരുണ്ടായിരുന്നുവെന്നാണ് റിപ്പോര്ട്ട്. തമിഴ് തൊഴിലാളികളാണ് ഈ പ്രദേശത്ത് കൂടുതലായി താമസിക്കുന്നത്. വൈദ്യുതി ഇല്ലാത്തതിനാല് കൃത്യമായ വിവരം ഇവിടെ നിന്ന് ലഭിച്ചിട്ടില്ല. രക്ഷാപ്രവര്ത്തകര് സംഭവ സ്ഥലത്തേക്ക് ഉടന് എത്തുമെന്ന് ജില്ലാ കളക്ടര് അറിയിച്ചു. സമീപത്തെ ആശുപത്രികള്ക്ക് ജാഗ്രതാനിര്ദേശം നല്കിയിട്ടുണ്ട്.
മണ്ണിടിച്ചിലുണ്ടായെന്ന് സ്ഥിരീകരിക്കുമ്പോഴും ദുരന്തത്തിന്റെ വ്യാപ്തി മനസ്സിലാക്കാന് സാധിച്ചിട്ടില്ല. പൊലീസിനോ റവന്യൂ വകുപ്പിനോ പ്രദേശത്തേക്ക് എത്തിച്ചേരാന് സാധിച്ചിട്ടില്ല. പ്രദേശത്തെ ബന്ധിപ്പിക്കുന്ന പെരിയവര പാലം തകര്ന്നതിനാല് പ്രദേശത്തേക്ക് എത്തിച്ചേരാനായിട്ടില്ല.
കഴിഞ്ഞ പ്രളയകാലത്താണ് പെരിയവര പാലം തകര്ന്നത്. പുതിയ പാലം നിര്മ്മാണം പൂര്ത്തിയായിട്ടില്ല. കഴിഞ്ഞ ദിവസമുണ്ടായ മഴയില് താത്കാലിക പാലവും തകര്ന്നതോടെ പ്രദേശം പൂര്ണമായും ഒറ്റപ്പെട്ടു. അതിനാല് തന്നെ വാഹനങ്ങള്ക്ക് എത്തിച്ചേരാനാകാത്ത സ്ഥിതിയാണ്.
മൂന്നാറില് നിന്ന് 30 കിലോമീറ്റര് അകലെയാണ് ഈ പ്രദേശം. സംരക്ഷിത പ്രദേശമായ ഇവിടേക്ക് റോഡ് സൗകര്യത്തിന്റെ അപര്യാപ്തതയുണ്ട്. ഇരവികളും ദേശീയോദ്യാനത്തിന്റെ ഭാഗമായ ഇവിടെ ഒരുപരിധിയില് കവിഞ്ഞ് വികസന പ്രവര്ത്തനങ്ങളും സാധിക്കില്ല. തോട്ടങ്ങള് ഉള്ളതിനാല് മാത്രമാണ് തൊഴിലാളികള്ക്ക് താമസിക്കാന് അവസരം നല്കിയിരിക്കുന്നത്.
ദുരന്തത്തെ കുറിച്ച് കൂടുതല് വിവരങ്ങള് ലഭ്യമായിട്ടില്ലെന്ന് മന്ത്രി എം.എം. മണി പ്രതികരിച്ചു. രക്ഷാപ്രവര്ത്തകര് ദുരന്ത സ്ഥലത്തേക്ക് പുറപ്പെട്ടു. അവര് അവിടെ എത്തിയതിന് ശേഷമേ കൂടുതല് വിവരങ്ങള് പറയാന് സാധിക്കൂയെന്നും അദ്ദേഹം കൂട്ടിച്ചേര്ത്തു.
അതേസമയം ഉരുള്പൊട്ടലുണ്ടായ ഇടുക്കി രാജമലയില് രക്ഷാപ്രവര്ത്തനത്തിനായി ദേശീയ ദുരന്തപ്രതിരോധ സേനയെ നിയോഗിച്ചതായി മുഖ്യമന്ത്രി പിണറായി വിജയന് പറഞ്ഞു. ഇടുക്കിയില് നേരത്തെ തന്നെ സജ്ജമാക്കിയിരുന്ന സംഘത്തോടാണ് രാജമലയിലേക്ക് പോകാന് നിര്ദ്ദേശിച്ചത്.
തൃശൂരില് ഉള്ള ഒരു സംഘം കൂടി ഇടുക്കിയിലെത്തും എന്ന് മുഖ്യമന്ത്രി പറഞ്ഞു. രക്ഷാ പ്രവര്ത്തനം ഊര്ജിതമാക്കാന് പോലീസ്, ഫയര്ഫോഴ്സ്, ഫോറസ്റ്റ്, റവന്യൂ അധികൃതര്ക്കും നിര്ദേശം നല്കി.
Discussion about this post