ജയ്‌പൂര്‍: വിവാദങ്ങള്‍ക്കൊടുവില്‍ രാജസ്ഥാന്‍ നിയമസഭ സമ്മേളനത്തിന് ഇന്ന് തുടക്കം. അശോക് ഗെഹ്ലോട്ട് സര്‍ക്കാരിനെതിരെ ബിജെപി അവിശ്വാസ പ്രമേയത്തിന് നോട്ടീസ് നല്‍കും. സമ്മേളനത്തിന് മുന്നോടിയായി കോണ്‍ഗ്രസ്, ബിജെപി നിയമസഭാകക്ഷിയോഗം ഇന്നലെ ചേര്‍ന്നു.
കോണ്‍ഗ്രസ് നിയമസഭാകക്ഷി യോഗത്തിന് മുന്നോടിയായി അശോക് ഗെഹ്‌ലോട്ടും സച്ചിന്‍ പൈലറ്റും കൂടിക്കാഴ്ച നടത്തി. ഒരു മാസത്തിന് ശേഷമാണ് രാജസ്ഥാനില്‍ ഇരുവരും തമ്മിലുള്ള കൂടിക്കാഴ്ച. സംഘടനാ ജനറല്‍ സെക്രട്ടറി കെ സി വേണുഗോപാലും ഒപ്പമുണ്ടായിരുന്നു.
സര്‍ക്കാറിനെതിരെ അവിശ്വാസ പ്രമേയം അവതരിപ്പിക്കുമെന്ന് പ്രതിപക്ഷമായ ബിജെപി തീരുമാനിച്ചതിന് പിന്നാലെ പാര്‍ട്ടിയിലെ ഇരുവിഭാഗവും ഒന്നിച്ചത് കോണ്‍ഗ്രസിന് ആശ്വാസമായി. സഭയില്‍ ഭൂരിപക്ഷം തെളിയിക്കുമെന്ന് ഗെഹ്ലോട്ട് മാധ്യമങ്ങളോട് പറഞ്ഞു. 200 അംഗ നിയമസഭയില്‍ 102 സീറ്റോടെയാണ് ഗലോട്ട് ഭരിക്കുന്നത്. 75 സീറ്റാണ് മുഖ്യപ്രതിപക്ഷമായ ബിജെപിക്കുള്ളത്. സര്‍ക്കാറിനെതിരെ അവിശ്വാസ പ്രമേയം പാസാകണമെങ്കില്‍ അധികമായി 30 എംഎല്‍എമാരുടെ പിന്തുണയെങ്കിയും ആവശ്യമാണ്. എംഎല്‍എമാരുടെ പരാതികള്‍ എല്ലാം പരിഹരിക്കുമെന്ന് മുഖ്യമന്ത്രി അശോക് ഗെഹ്ലോട്ട് അറിയിച്ചു.
കഴിഞ്ഞ ദിവസം ചേര്‍ന്ന ബിജെപി നിയമസഭാകക്ഷി യോഗത്തിലാണ് അവിശ്വാസപ്രമേയം കൊണ്ടുവരാന്‍ തീരുമാനിച്ചത്.
Discussion about this post