ജമ്മുകശ്മീരിൽ ഈ വർഷം നടത്തിയ 77 ഓപറേഷനുകളിലൂടെ സുരക്ഷാ സേന കൊലപ്പെടുത്തിയത് 177 ഭീകരരെയാണെന്ന് ജമ്മുകശ്മീർ ഡിജിപി ദിൽബാഗ് സിംഗ്. വ്യാഴാഴ്ച നടത്തിയ ബതാമലൂ ഓപ്പറേഷൻ വിജയകരമായിരുന്നുവെന്നും തീവ്രവാദികളുടെ വെടിയേറ്റ് ഒരു സ്ത്രീ കൊല്ലപ്പെട്ടത് തീർത്തും നിർഭാഗ്യകരമാണെന്നും ദിൽബാഗ് സിംഗ് വാർത്താസമ്മേളനത്തിൽ മാധ്യമങ്ങളോട് പറഞ്ഞു.
ശ്രീനഗറിലെ ബതാമലൂവിൽ ഭീകരവാദികളുടെ സാന്നിധ്യമുണ്ടെന്ന് വിവരം ലഭിച്ചതിനെ തുടർന്ന് വ്യാഴാഴ്ച അർധരാത്രി സുരക്ഷാ ഉദ്യോഗസ്ഥർ നടത്തിയ തിരച്ചിലിലാണ് ഭീകരവാദികളെ കണ്ടെത്താനായത്. ഭീകരർക്ക് കീഴടങ്ങാൻ അവസരം നൽകിയെങ്കിലും സുരക്ഷാ ഉദ്യോഗസ്ഥർക്കു നേരെ ഭീകരർ വെടിയുതിർക്കുകയായിരുന്നുവെന്നാണ് സൈനിക വൃത്തങ്ങൾ വെളിപ്പെടുത്തിയത്.തുടർന്നുണ്ടായ ഏറ്റുമുട്ടലിൽ,അവരെ സൈന്യം കൊലപ്പെടുത്തുകയായിരുന്നുവെന്ന് ഡിജിപി വ്യക്തമാക്കി
