കള്ളപ്പണം വെളുപ്പിക്കൽ നിരോധന നിയമപ്രകാരം ആയുധ ഇടപാടുകാരൻ സഞ്ജയ് ഭണ്ഡാരിക്കെതിരെ കേസെടുത്ത് എൻഫോഴ്‌മെന്റ് ഡയറക്ട്രേറ്റ്. കള്ളപ്പണം വെളുപ്പിക്കൽ നിരോധന നിയമത്തിന്റെ 44, 45 വകുപ്പുകൾ പ്രകാരമാണ് സഞ്ജയ് ഭണ്ഡാരിക്കും കൂട്ടാളികൾക്കുമെതിരെ കേസെടുത്തിരിക്കുന്നത്. എൻഫോഴ്സ്മെന്റ് സമർപ്പിച്ച കുറ്റപത്രത്തിൽ ഇക്കാര്യം വ്യക്തമാക്കിയിട്ടുണ്ട്. ഇയാൾ നിലവിൽ ഒളിവിലാണ്.
എൻഫോഴ്‌മെന്റ് ഡയറക്ട്രേറ്റ് റൗസ് അവന്യു കോടതിയിൽ സമർപ്പിച്ച കുറ്റപത്രത്തിൽ കോൺഗ്രസ്‌ ദേശീയ അധ്യക്ഷ സോണിയാ ഗാന്ധിയുടെ മരുമകൻ റോബർട്ട് വധേരയുടെ പേരുമുണ്ടെന്നാണ് ലഭ്യമാവുന്ന വിവരങ്ങൾ. കള്ളപ്പണം വെളുപ്പിക്കലുമായി ബന്ധപ്പെട്ട് വിദേശ രാജ്യങ്ങളിലെ കമ്പനികളുമായി സഞ്ജയ് ഭണ്ഡാരി വിവിധ ഇടപാടുകളിൽ ഏർപ്പെട്ടിരുന്നു. ഈ കമ്പനികൾക്കെതിരെയും കേസ് ചാർജ് ചെയ്തിട്ടുണ്ട്.
യു.കെയിൽ നിന്നും ഉടൻ തന്നെ സഞ്ജയ് ഭണ്ഡാരിയെ ഇന്ത്യയിലെത്തിക്കാനുള്ള നടപടികൾ സ്വീകരിക്കണമെന്ന് എൻഫോഴ്‌മെന്റ് ഡയറക്ട്രേറ്റിനോട് കോടതി നിർദേശിച്ചു. നേരത്തെ സഞ്ജയ് ഭണ്ഡാരിയെ യു.കെയിൽ വെച്ച് അറസ്റ്റ് ചെയ്തിരുന്നു. ഇയാളെ ഇന്ത്യയ്ക്ക് കൈമാറാനുള്ള നടപടികൾ പുരോഗമിക്കവേയാണ്‌ യു.കെ ഭരണകൂടം സഞ്ജയ് ഭണ്ഡാരിക്ക് ജാമ്യം നൽകിയത്.
