മുംബൈ പോലീസ് കമ്മീഷ്ണർ പരംബീർ സിങിനെതിരെ നിയമ നടപടികൾക്കൊരുങ്ങി റിപ്പബ്ലിക്ക് ചാനലിന്റെ എഡിറ്റർ ഇൻ ചീഫ് അർണബ് ഗോസ്വാമി. അർണബ് ഗോസ്വാമിയേയും റിപ്പബ്ലിക്ക് മീഡിയ നെറ്റ്വർക്കിനേയും അപകീർത്തിപ്പെടുത്തിയതിന് 200 കോടി രൂപ നഷ്ടപരിഹാരമാവശ്യപ്പെട്ടായിരിക്കും അർണബ് പരാതി നൽകുക.
ഇന്ത്യൻ പീനൽ കോഡിലെ സെക്ഷൻ 500 ( അപകീർത്തിപ്പെടുത്തൽ) പ്രകാരം പോലീസ് കമ്മീഷണർക്കെതിരെ പരാതി നൽകാനുള്ള നടപടികൾ അർണബിന്റെ ലീഗൽ ടീമായ ഫീനക്സ് ലീഗൽ ആരംഭിച്ചു കഴിഞ്ഞുവെന്നാണ് ലഭ്യമാകുന്ന വിവരങ്ങൾ. ടിആർപി കേസിലെ എഫ്ഐആറിൽ റിപ്പബ്ലിക്ക് ചാനലിന്റെ പേരില്ലായിരുന്നുവെന്ന് മുംബൈ പോലീസിനെയും മഹാരാഷ്ട്ര സർക്കാരിനെയും പ്രതിനിധീകരിച്ച് ഹാജരായ അഭിഭാഷകൻ കോടതിയെ അറിയിച്ചിരുന്നു. ഇതിനു പിന്നാലെയാണ് മുംബൈ പോലീസ് കമ്മീഷ്ണർ പരംബീർ സിങിനെതിരെ നിയമനടപടികൾക്ക് ഒരുങ്ങുകയാണെന്ന കാര്യം അർണബ് ഗോസ്വാമി അറിയിച്ചത്.
റിപ്പബ്ലിക് ചാനൽ, സ്പെഷൽ എക്സിക്യൂട്ടീവ് മജിസ്ട്രേറ്റിനെതിരെയും അസിസ്റ്റന്റ് പോലീസ് കമ്മീഷണർ സുധീർ ജാംബ്വാദേക്കറിനെതിരെയും കണ്ടംപ്റ്റ് പെറ്റീഷൻ ഫയൽ ചെയ്യുമെന്നും അർണബ് ഗോസ്വാമി കൂട്ടിച്ചേർത്തു.
