ഭോപ്പാൽ : രാജ്യത്ത് ഉള്ളിവില കുതിച്ചുയരുന്ന സാഹചര്യത്തിൽ ജനങ്ങൾക്ക് ആശ്വാസം നൽകുന്നതിനായി ഒരു ലക്ഷം ടൺ ബഫർ സ്റ്റോക്ക് പുറത്തിറക്കുമെന്ന് കേന്ദ്ര കൃഷി മന്ത്രി നരേന്ദ്ര സിംഗ് തോമർ. ധരംപുരി നഗരത്തിൽ തിരഞ്ഞെടുപ്പ് പ്രചരണത്തിന്റെ ഭാഗമായി നടന്ന റാലിയെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.
ഇൻഡോറിലെ സാൻവർ അസംബ്ലി സീറ്റിൽ നിന്ന് ഉപതെരഞ്ഞെടുപ്പിൽ മത്സരിക്കുന്ന മധ്യപ്രദേശ് ജലവിഭവ വകുപ്പ് മന്ത്രി തുളസിറാം സിലാവത്തിനെ പിന്തുണയ്ക്കുന്നതിനായാണ് നരേന്ദ്ര സിംഗ് തോമർ ധരംപുരിയിലെത്തിയത്. ഉള്ളിയുടെ വില കുതിച്ചുയരുന്ന കാര്യം സർക്കാരിന്റെ ശ്രദ്ധയിൽപ്പെട്ടിട്ടുണ്ടെന്നും ഒരു ലക്ഷം ടൺ ബഫർ സ്റ്റോക്ക് നാഫെഡ് (എൻഎഎഫ്ഡി) വഴി ഉടൻ പുറത്തിറക്കുമെന്നും മന്ത്രി പറഞ്ഞു.
മാത്രമല്ല, രാജ്യത്ത് നിന്നും ഉള്ളി കയറ്റുമതി ചെയ്യുന്നതിനു നിരോധനം ഏർപ്പെടുത്തിയിട്ടുണ്ടെന്ന് അദ്ദേഹം വ്യക്തമാക്കി. പുതിയ കാർഷിക നിയമങ്ങളെ സംബന്ധിച്ച് നടന്നു വരുന്ന പ്രതിപക്ഷ പാർട്ടികളുടെ പ്രതിഷേധ പരിപാടികളെ കുറിച്ചും റാലിയിൽ കേന്ദ്ര കൃഷി മന്ത്രി സംസാരിച്ചു. കോൺഗ്രസിനു ഇരട്ടത്താപ്പുണ്ടെന്ന് ഊന്നൽ നൽകിയാണ് അദ്ദേഹം പ്രതിഷേധങ്ങളെ കുറിച്ച് പരാമർശിച്ചത്.
Discussion about this post