ലക്നൗ: ഉത്തർപ്രദേശിൽ എത്രയും പെട്ടെന്ന് കോവിഡ്-19 വാക്സിനേഷൻ ആരംഭിക്കുമെന്ന് യോഗി സർക്കാർ. ഇതിന്റെ ഭാഗമായി സർക്കാർ ജനുവരി 31 വരെയുള്ള ആരോഗ്യ പ്രവർത്തകരുടെ ലീവുകൾ റദ്ദാക്കിയിട്ടുണ്ട്.
ഡോക്ടർമാർ, നഴ്സുമാർ, ദിവസ വേതന ജോലിക്കാർ ഉൾപ്പെടെയുള്ളവരുടെ ലീവുകളാണ് സർക്കാർ റദ്ദാക്കിയിട്ടുള്ളത്. ഇക്കാര്യം വ്യക്തമാക്കി യുപിയിലെ മെഡിക്കൽ, ആരോഗ്യ-കുടുംബക്ഷേമ വകുപ്പിന്റെ ഡയറക്ടർ ജനറൽ രാകേഷ് ഡൂബെ ഉത്തരവിറക്കിയിട്ടുണ്ട്. കോവിഡ് വാക്സിനേഷൻ ആരംഭിക്കുന്ന സാഹചര്യത്തിൽ എല്ലാ ആരോഗ്യ പ്രവർത്തകരുടെയും സഹകരണം ആവശ്യമായതിനാലാണ് ഇത്തരത്തിലൊരു നടപടി സ്വീകരിച്ചിരിക്കുന്നതെന്ന് ഉത്തരവിൽ പറയുന്നു.
ഇപ്പോൾ അവധിയിലിരിക്കുന്ന ആരോഗ്യ പ്രവർത്തകർക്ക് ഇതുപ്രകാരം ഉടൻ അറിയിപ്പ് ലഭിക്കും. ആദ്യ ഘട്ടത്തിൽ ഡോക്ടർമാർ, ആരോഗ്യ പ്രവർത്തകർ, മറ്റു മുൻനിര പ്രവർത്തകർ എന്നിവർക്കായിരിക്കും വാക്സിനേഷൻ നടത്തുക. ലഭിച്ചിരിക്കുന്ന കണക്കുകൾ പ്രകാരം ഗോരഖ്പൂരിൽ മാത്രം ആദ്യ ഘട്ടത്തിൽ 23,000 പേർ വാക്സിനേഷന് വിധേയരാകുമെന്ന് ഗോരഖ്പൂർ ജില്ലാ ആശുപത്രിയിലെ ചീഫ് മെഡിക്കൽ ഓഫീസറായ ഡോ. ശ്രീകാന്ത് തിവാരി പറഞ്ഞു.
Discussion about this post