ന്യൂഡൽഹി: ഡൽഹിയിലെ റാകബ് ഗഞ്ച് സാഹിബ് ഗുരുദ്വാരയിൽ അപ്രതീക്ഷിത സന്ദർശനം നടത്തി പ്രധാനമന്ത്രി നരേന്ദ്രമോദി. ഗുരുദ്വാരയിൽ എത്തിയ പ്രധാനമന്ത്രി ഗുരു തേജ് ബഹദൂറിന് ആദരവർപ്പിച്ചു.
ശ്രീ ഗുരു തേജ് ബഹദൂറിന്റെ മൃതദേഹം സംസ്കരിച്ച ചരിത്രപ്രസിദ്ധമായ റാകബ് ഗഞ്ച് സാഹിബ് ഗുരുദ്വാരയിൽ പ്രാർത്ഥന നടത്തിയതായി സന്ദർശനത്തിന് ശേഷം പ്രധാനമന്ത്രി ട്വീറ്റ് ചെയ്തു. ഔറംഗസേബ് വധിച്ച ഗുരു തേജ് ബഹദൂറിനെ സംസ്കരിച്ച സ്ഥലമാണ് റാകബ് ഗഞ്ച് സാഹിബ് ഗുരുദ്വാര.”ഗുരുദ്വാരയിലെത്തി പ്രാർത്ഥന നടത്തി. ശ്രീ ഗുരു തേജ് ബഹദൂറിന്റെ ശവകുടീരം സന്ദർശിച്ച് അനുഗൃഹീതനാവുകയും ഗുരുവിന്റെ ജീവിത ത്യാഗത്തിൽ ഞാൻ പ്രചോദിതനാവുകയും ചെയ്തു.”- പ്രധാനമന്ത്രി ട്വിറ്ററിൽ കുറിച്ചു.
നരേന്ദ്രമോദിയുടെ സന്ദർശനം നേരത്തെ നിശ്ചയിക്കപ്പെട്ടിരുന്നില്ല. അതുകൊണ്ട് തന്നെ, സന്ദർശന സമയത്ത് പ്രത്യേക നിയന്ത്രണങ്ങളും ഏർപ്പെടുത്തിയിരുന്നില്ല. സാധാരണക്കാരുടെ സന്ദർശനത്തിന് ഒരുതരത്തിലുള്ള തടസ്സവും സൃഷ്ടിക്കാതെയാണ് പ്രധാനമന്ത്രി ഗുരുദ്വാരയിലെത്തിയത്.
സിഖ് മത വിശ്വാസികളുടെ പ്രധാന ആരാധനാലയമാണ് ഡൽഹിയിലെ റാകബ് ഗഞ്ച് സാഹിബ് ഗുരുദ്വാര. ഗുരുദ്വാര സന്ദർശനത്തിനിടെ ജനങ്ങളുമായി പ്രധാനമന്ത്രി സംവദിക്കുന്ന വീഡിയോ സാമൂഹ്യമാധ്യമങ്ങളിലെല്ലാം വൈറലായിക്കൊണ്ടിരിക്കുകയാണ്.
Discussion about this post