ദോഹ: ഇന്ത്യ സന്ദർശിക്കാനുള്ള പ്രധാനമന്ത്രി നരേന്ദ്രമോദിയുടെ ക്ഷണം സ്വീകരിച്ച് ഖത്തർ അമീർ ഷെയ്ഖ് തമീം ബിൻ ഹമദ് അൽത്താനി. അധികം വൈകാതെ തന്നെ ഇന്ത്യ സന്ദർശിക്കാനെത്തുമെന്ന് അമീർ ഉറപ്പു നൽകിയിട്ടുണ്ട്.
അമീരി ദിവാനിൽ വിദേശകാര്യ മന്ത്രി എസ്. ജയശങ്കർ അമീറുമായി കൂടിക്കാഴ്ച നടത്താനെത്തിയിരുന്നു. ഈ കൂടിക്കാഴ്ചയിൽ എസ്.ജയശങ്കറാണ് പ്രധാനമന്ത്രി നരേന്ദ്ര മോദിയുടെ കത്ത് കൈമാറിയത്. കോവിഡിനിടെ ഇന്ത്യക്കാർക്ക് നൽകിയ പരിഗണനയ്ക്ക് പ്രധാനമന്ത്രി കത്തിലൂടെ നന്ദിയറിയിച്ചു. അടുത്ത വർഷം ഇന്ത്യയിൽ നടക്കാനിരിക്കുന്ന പ്രഥമ സംയുക്ത കമ്മീഷനിൽ പങ്കെടുക്കാൻ ഖത്തർ വിദേശകാര്യ മന്ത്രി ഷെയ്ഖ് മുഹമ്മദിനെ കേന്ദ്രമന്ത്രി ക്ഷണിച്ചിട്ടുണ്ട്. ഇന്ത്യക്കാർ ഖത്തറിന്റെ പുരോഗതിയിൽ നൽകുന്ന സംഭാവനകൾ, സാമ്പത്തികം, നിക്ഷേപം തുടങ്ങിയ കാര്യങ്ങൾ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൾറഹ്മാൻ അൾത്താനിയുമായുള്ള കൂടിക്കാഴ്ചയിൽ ചർച്ചയായി.
കഴിഞ്ഞ ദിവസം ഇന്ത്യയുടെ നിക്ഷേപ സാധ്യതകൾ പ്രയോജനപ്പെടുത്താൻ ഖത്തറിലെ വ്യവസായികളെ കേന്ദ്രമന്ത്രി ക്ഷണിച്ചിരുന്നു. എസ്. ജയശങ്കർ കഴിഞ്ഞ ദിവസം ഖത്തർ ചേംബർ, ഖത്തർ ബിസിനസ്മെൻ അസോസിയേഷൻ അധികൃതരുമായി നടത്തിയ കൂടിക്കാഴ്ച ഇരു രാജ്യങ്ങളിലേയും സ്വകാര്യ മേഖലകൾ തമ്മിലുള്ള സഹകരണം ശക്തിപ്പെടുത്താൻ സഹായകമായേക്കുമെന്നാണ് വിലയിരുത്തൽ.
Discussion about this post