മെല്ബണ്: ഓസ്ട്രേലിയയിലുള്ള എല്ലാ ഇന്ത്യന് ക്രിക്കറ്റ് താരങ്ങളുടെയും കോവിഡ് പരിശോധാനാഫലം നെഗറ്റീവ്. അഞ്ച് ഇന്ത്യന് താരങ്ങള് കോവിഡ് പ്രോട്ടോകോള് മറികടന്ന് റെസ്റ്റോറന്റില് പോയി ഭക്ഷണം കഴിച്ചത് വലിയ വിവാദമായിരുന്നു. ഇതേ തുടര്ന്ന് ഉപനായകന് രോഹിത് ശര്മ അടക്കം അഞ്ച് താരങ്ങള്ക്ക് നിര്ബന്ധിത ഐസോലേഷന് ഏര്പ്പെടുത്തിയിരുന്നു.
“ജനുവരി മൂന്നിന് ഇന്ത്യന് ക്രിക്കറ്റ് ടീമിലെ താരങ്ങള്, സ്റ്റാഫുകള് എന്നിവരെ ആര്ടി-പിസിആര് ടെസ്റ്റിന് വിധേയമാക്കി. എല്ലാവരുടെയും പരിശോധാനാഫലം നെഗറ്റീവ് ആണ്,” ബിസിസിഐ ഔദ്യോഗിക വാര്ത്താക്കുറിപ്പില് അറിയിച്ചു.
ജനുവരി ഏഴ് മുതലാണ് ഇന്ത്യ-ഓസ്ട്രേലിയ ടെസ്റ്റ് പരമ്പരയിലെ മൂന്നാം മത്സരം. സിഡ്നിയിലാണ് മൂന്നാം ടെസ്റ്റ്. മെല്ബണിലുള്ള ഇന്ത്യന് ടീം ഇന്ന് ചാര്ട്ടേഡ് വിമാനത്തില് സിഡ്നിയിലേക്ക് പോകും.
ഈയാഴ്ച തുടക്കത്തില് മെല്ബണിലെ ഒരു റെസ്റ്റോറന്റില് പോയി ഭക്ഷണം കഴിച്ച അഞ്ച് താരങ്ങള്ക്കാണ് നേരത്തെ ഐസോലേഷന് നിര്ദേശിച്ചത്.
രോഹിത് ശര്മയ്ക്ക് പുറമെ യുവ ഓപ്പണര് ശുഭ്മാന് ഗില്, വിക്കറ്റ് കീപ്പര് ബാറ്റ്സ്മാന് റിഷഭ് പന്ത്, പേസ് ബൗളര് നവ്ദീപ് സൈനി, യുവതാരം പൃഥ്വി ഷാ എന്നിവരാണ് മറ്റ് താരങ്ങള്.
Discussion about this post