ഡൽഹി: ആദ്യ ഡിജിറ്റൽ ബജറ്റിനുള്ള മുന്നൊരുക്കങ്ങൾ ശക്തമാക്കി കേന്ദ്ര സർക്കാർ. ‘യൂണിയൻ ബജറ്റ്‘ എന്ന് പേരിട്ടിരിക്കുന്ന മൊബൈൽ ആപ്പ് കേന്ദ്ര ധനകാര്യ വകുപ്പ് മന്ത്രി നിർമ്മല സീതാരാമൻ പുറത്തിറക്കി. കടലാസ് രഹിതമായി ബജറ്റ് അവതരിപ്പിക്കുന്ന പശ്ചാത്തലത്തിൽ ബജറ്റിലെ വിവരങ്ങൾ ആപ്പ് വഴി ലഭ്യമാകും.
വാർഷിക സാമ്പത്തിക പ്രസ്താവന, ഡിജി, ധനകാര്യ ബില്ലുകൾ തുടങ്ങി പതിനാല് ബജറ്റ് രേഖകളും ആപ്പിൽ ലഭ്യമാകും. ധനകാര്യ മന്ത്രിയുടെ ബജറ്റ് പ്രസംഗം പൂർത്തിയായാലുടൻ ആപ്പിൽ വിവരങ്ങൾ ലഭ്യമാകും. ഫെബ്രുവരി ഒന്നാം തീയതിയാണ് കേന്ദ്ര ബജറ്റ്.
ഇംഗ്ലീഷ്, ഹിന്ദി ഭാഷകളിൽ ആപ്പ് പ്രവർത്തിക്കും. ആൻഡ്രോയ്ഡ്, ഐഓഎസ് പ്ലാറ്റ്ഫോമുകളിൽ ആപ്പ് ലഭ്യമാകും. കേന്ദ്ര ബജറ്റ് വെബ് പോർട്ടൽ www.indiabudget.gov.in വഴിയും ആപ്പ് ഡൗൺലോഡ് ചെയ്യാവുന്നതാണ്.
