ഡൽഹി: കർഷക സമരം ഉടൻ അവസാനിക്കുമെന്ന് കേന്ദ്ര കൃഷി മന്ത്രി നരേന്ദ്ര സിംഗ് തോമർ. യഥാർത്ഥ കർഷകർക്ക് കാര്യങ്ങൾ ബോദ്ധ്യപ്പെട്ടുവെന്നും അദ്ദേഹം പറഞ്ഞു.
ഇതുവരെ പതിനൊന്ന് തവണ സമരക്കാരുമായി ചർച്ച നടന്നുവെന്നും പ്രശ്നങ്ങൾ പരിഹരിക്കപ്പെടുമെന്നാണ് പ്രതീക്ഷയെന്നും മന്ത്രി പറഞ്ഞു. പ്രശ്നം പരിഹരിക്കപ്പെടാത്തതിന് കാരണം ചില സംഘടനകളുടെ പിടിവാശിയാണ്. അവർക്ക് വിഷയം പ്രശ്നപരിഹാരമല്ല, രാഷ്ട്രീയമാണ്. അവരെ അധികം വൈകാതെ കർഷകർ തന്നെ തിരിച്ചറിയുമെന്നും അദ്ദേഹം പറഞ്ഞു.
ഒന്നര വർഷത്തേക്ക് നിയമങ്ങൾ നടപ്പിലാക്കുന്നത് നിർത്തി വെക്കാമെന്ന് സർക്കാർ സമരക്കാരെ അറിയിച്ചിരുന്നു. പ്രശ്നപരിഹാരത്തിന് സമിതി നിലവിൽ വന്നു. ഇത്രയൊക്കെ ആയിട്ടും സമരം അവസാനിപ്പിക്കാൻ തയ്യാറാകാത്തത് ചിലരുടെ മാത്രം പിടിവാശികൊണ്ടാണെന്നും കേന്ദ്ര മന്ത്രി പറഞ്ഞു.
പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ കർഷകർക്കായി നിരവധി പദ്ധതികൾ നടപ്പിലാക്കി വരുന്നുണ്ട്. എം എസ് പിയും ഉയർത്തിയിട്ടുണ്ടെന്നും അദ്ദേഹം വ്യക്തമാക്കി.
