മദുരൈ: തമിഴ്നാട് തെരഞ്ഞെടുപ്പിൽ എ ഐ എ ഡി എം കെയുമായി സഖ്യം തുടരുമെന്ന് ബിജെപി. പാർട്ടി ദേശീയ അധ്യക്ഷൻ ജെ പി നഡ്ഡ ഇക്കാര്യം ഔദ്യോഗികമായി പ്രഖ്യാപിച്ചു.
വരുന്ന തമിഴ്നാട് തെരഞ്ഞെടുപ്പിൽ എ ഐ എ ഡി എം കെയുമായും സമാന ചിന്താഗതിക്കാരായ പാർട്ടികളുമായുള്ള സഖ്യം തുടരുമെന്ന് ജെ പി നഡ്ഡ വ്യക്തമാക്കി. തമിഴ്നാട്ടിലെ മദുരൈയിൽ നടന്ന ഒരു റാലിയിലാണ് അദ്ദേഹം ഇക്കാര്യം വ്യക്തമാക്കിയത്.
കോൺഗ്രസ്- ഡി എം കെ സഖ്യം കേന്ദ്രത്തിൽ ഇരുന്നപ്പോൾ അവർ തമിഴ്നാടിനെ പൂർണ്ണമായും അവഗണിച്ചു. എന്നാൽ പ്രതിരോധ ഇടനാഴി ഉൾപ്പെടെ നിരവധി പദ്ധതികൾ പ്രധാനമന്ത്രി നരേന്ദ്ര മോദി സംസ്ഥാനത്തിന് വേണ്ടി നടപ്പിലാക്കിയെന്നും അദ്ദേഹം പറഞ്ഞു. ശരിയായ വ്യക്തികൾ ശരിയായ സ്ഥാനത്ത് ഇരിക്കുമ്പോൾ ശരിയായ തീരുമാനങ്ങൾ നടപ്പിലാകുമെന്നും നഡ്ഡ കൂട്ടിച്ചേർത്തു.
ബിജെപി തമിഴ് സംസ്കാരത്തോടും ഭാഷയോടും ഒരു ബഹുമാനവും കാട്ടിയില്ലെന്ന രാഹുൽ ഗാന്ധിയുടെ വിമർശനത്തിനും ജെ പി നഡ്ഡ മറുപടി പറഞ്ഞു. ലഡാക്കിലെ സൈനികർക്ക് ആത്മവീര്യം പകരാൻ പ്രധാനമന്ത്രി നരേന്ദ്ര മോദി തിരുക്കുറലിലെ വരികൾ ഉദ്ധരിച്ചത് നഡ്ഡ ഓർമ്മിപ്പിച്ചു. 2019ൽ ഐക്യരാഷ്ട്ര പൊതുസഭയെ അഭിസംബോധന ചെയ്യവെ തമിഴ് കവി കനിയൻ പൂങ്കുണ്ട്രനാരുടെ ‘യാടും ഊരൈ‘ വരികൾ പ്രധാനമന്ത്രി ഉദ്ധരിച്ചതും അദ്ദേഹം ചൂണ്ടിക്കാട്ടി.
Discussion about this post