ദില്ലി: കേന്ദ്ര ബജറ്റ് അവതരണത്തില്‍ ഓസ്‌ട്രേലിയയില്‍ ഇന്ത്യന്‍ ക്രിക്കറ്റ് ടീമിന്റെ ഐതിഹാസിക വിജയം പരാമര്‍ശിച്ച്‌ ധനമന്ത്രി നിര്‍മലാ സീതാരാമന്‍. ഇന്ത്യയുടെ പ്രകടനത്തെ ധനമന്ത്രി വാനോളം പുകഴ്ത്തി. ഈ അവസരത്തില്‍ ഒരു ക്രിക്കറ്റ് പ്രേമികളുടെ രാജ്യമെന്ന നിലയില്‍ ഓസ്‌ട്രേലിയക്കെതിരായ വിജയത്തിലൂടെ നാം അനുവഭിച്ച ആനന്ദം ഒരിക്കല്‍ കൂടി ഓര്‍ക്കുകയാണെന്ന് ധനമന്ത്രി പറഞ്ഞു.
ഒരു ജനതയെന്ന നിലയില്‍ നമുക്കുള്ള ഗുണങ്ങളെയാണ് ഈ വിജയം ഓര്‍മിപ്പിക്കുന്നത്. പ്രധാനമായും യുവജനതയ്ക്കിടയില്‍ എത്രത്തോളം വിജയതൃഷ്ണയുണ്ടെന്നും ഇതില്‍ നിന്ന് നമുക്ക് മനസ്സിലായി. അവര്‍ ഭാവിയുടെ വാഗ്ദാനങ്ങളാണെന്ന് നമുക്ക് മുന്നില്‍ തെളിയിച്ചെന്നും ധനമന്ത്രി വ്യക്തമാക്കി.
ഇത് കേന്ദ്രത്തില്‍ നിന്ന് മുന്‍നിര നേതാക്കള്‍ ഈ വിജയത്തെ പുകഴ്ത്തുന്നത് തുടര്‍ച്ചയായ രണ്ടാം ദിനമാണ്. കഴിഞ്ഞ ദിവസം മന്‍ കീ ബാത്തില്‍ പ്രധാനമന്ത്രി നരേന്ദ്ര മോദിയും ഇന്ത്യയുടെ ചരിത്ര വിജയത്തെ അഭിനന്ദിച്ചിരുന്നു.
