ഡൽഹി: ഇന്ത്യയോട് കൊവിഡ് വാക്സിൻ സഹായം അഭ്യർത്ഥിച്ച് കനേഡിയൻ പ്രധാനമന്ത്രി ജസ്റ്റിൻ ട്രൂഡോ. ഇന്ത്യയിൽ നിന്നും കൊവിഡ് വാക്സിൻ ആവശ്യപ്പെട്ട് കനേഡിയൻ പ്രധാനമന്ത്രി ജസ്റ്റിൻ ട്രൂഡോ ഇന്ന് പ്രധാനമന്ത്രി നരേന്ദ്ര മോദിയെ ടെലിഫോണിൽ ബന്ധപ്പെട്ടിരുന്നു. കാനഡയുടെ വാക്സിൻ വിതരണ പദ്ധതിയെ പിന്തുണയ്ക്കാൻ സാധ്യമായ എല്ലാ സഹായങ്ങളും ചെയ്തു നൽകുമെന്ന് ഇന്ത്യ ഉറപ്പ് നൽകി.
ഇന്ത്യയുടെ കൊവിഡ് വാക്സിൻ വിതരണ പദ്ധതിയെ അഭിനന്ദിച്ചു കൊണ്ടാണ് ട്രൂഡോ സംസാരിച്ചു തുടങ്ങിയത്. ‘ലോകം കൊവിഡിൽ നിന്നും കരകയറുകയാണ്. അതിന് പിന്നിൽ ഇന്ത്യയുടെ ഔഷധ വിതരണ സംവിധാനത്തിന് പ്രത്യേകമായ പങ്കുണ്ട്. ഇന്ത്യ വികസിപ്പിച്ച വാക്സിൻ ലോകമെമ്പാടും എത്തിക്കുന്നതിന് ആത്മാർത്ഥമായി പ്രയത്നിക്കുകയാണ് പ്രധാനമന്ത്രി നരേന്ദ്ര മോദി. അദ്ദേഹത്തിന്റെ നേതൃപാടവം അതുല്യമാണ്.‘ ജസ്റ്റിൻ ട്രൂഡോ അഭിപ്രായപ്പെട്ടു.
ട്രൂഡോയുടെ അഭിനന്ദനങ്ങൾക്ക് നന്ദി അറിയുക്കതായി പ്രധാനമന്ത്രി നരേന്ദ്ര മോദി പറഞ്ഞു. തുടർന്ന് കാനഡയുടെ ആവശ്യം കേട്ട നരേന്ദ്ര മോദി, വാക്സിൻ ലഭ്യമാക്കാൻ സഹായിക്കാമെന്ന് കനേഡിയൻ പ്രധാനമന്ത്രിക്ക് ഉറപ്പ് നൽകി.
Was happy to receive a call from my friend @JustinTrudeau. Assured him that India would do its best to facilitate supplies of COVID vaccines sought by Canada. We also agreed to continue collaborating on other important issues like Climate Change and the global economic recovery.
— Narendra Modi (@narendramodi) February 10, 2021
പല വിഷയങ്ങളിലും ഇരു രാജ്യങ്ങളുടെയും അഭിപ്രായം സമാനമാണെന്ന് ഇരു നേതാക്കളും അഭിപ്രായപ്പെട്ടു. കൊവിഡ് വ്യാപനം മൂലമുണ്ടായ സാമ്പത്തിക പ്രത്യാഘാതങ്ങൾ നേരിടുന്നതിന് ഇരു രാജ്യങ്ങളും ഒരുമിച്ച് നിൽക്കും. കാലാവസ്ഥാ വ്യതിയാനം പോലുള്ള വിഷയങ്ങളിൽ പരസ്പര ധാരണയോടെ മുന്നോട്ട് പോകുമെന്നും ഇരുവരും അഭിപ്രായപ്പെട്ടു.
കാനഡക്ക് പുറമെ ദക്ഷിണാഫ്രിക്ക, സൗദി അറേബ്യ, മംഗോളിയ എന്നിവിടങ്ങളിലേക്കും ഇന്ത്യ വരു ദിവസങ്ങളിൽ കൊവിഡ് വാക്സിൻ കയറ്റി അയക്കുമെന്ന് വിദേശകാര്യ മന്ത്രാലയം വ്യക്തമാക്കി.
