ഡൽഹി: സ്വയം നിരീക്ഷണത്തിൽ കഴിയുന്ന കൊവിഡ് രോഗികൾക്ക് സമാശ്വാസവുമായി ബിജെപി പ്രവർത്തകർ. ഒറ്റപ്പെട്ട് കഴിയുന്ന രോഗികൾക്ക് ആശ്വാസമായി മോദി കിറ്റ് വിതരണം തുടരുന്നു. ബിജെപി ഡൽഹി ഘടകത്തിന്റെ നേതൃത്വത്തിലാണ് കിറ്റ് വിതരണം.
ഓക്സിമീറ്ററുകൾ, അവശ്യ മരുന്നുകൾ, നിത്യോപയോഗ സാധനങ്ങൾ എന്നിവയടങ്ങിയതാണ് മോദി കിറ്റുകൾ. കിറ്റുകൾ വിതരണം ചെയ്യുന്നതിന് പുറമെ രോഗികൾ താമസിക്കുന്ന ചുറ്റുപാടുകൾ മുഴുവൻ ശുചീകരിക്കാനും പ്രവർത്തകർ മുന്നിട്ടിറങ്ങിയിരിക്കുകയാണ്.
പരമാവധി ജനങ്ങളിലേക്ക് ഈ സഹായം എത്തിക്കാനാണ് പാർട്ടി ശ്രമിക്കുന്നത്. ഡൽഹിയിൽ കൊവിഡ് വ്യാപനം ചെറുക്കാൻ സർക്കാർ നടത്തുന്ന എല്ലാ പ്രവർത്തനങ്ങൾക്കും പൂർണ്ണ പിന്തുണ വാഗ്ദാനം ചെയ്യുകയാണെന്നും ബിജെപി ഡൽഹി ഘടകം അധ്യക്ഷൻ ആദേശ് ഗുപ്ത അറിയിച്ചു.
അതേസമയം ഡൽഹിയിൽ കൊവിഡ് വ്യാപനം രൂക്ഷമായി തുടരുകയാണ്. കഴിഞ്ഞ ഒരു ദിവസം മാത്രം 19,486 പുതിയ കേസുകളാണ് റിപ്പോർട്ട് ചെയ്തിരിക്കുന്നത്. ഡൽഹിയിലെ ഏറ്റവും ഉയർന്ന പ്രതിദിന രോഗബാധ നിരക്കാണിത്. 141 മരണങ്ങളും സ്ഥിരീകരിച്ചു.
