ഡൽഹി: പ്രധാനമന്ത്രി കിസാൻ സമ്മാൻ നിധി പദ്ധതിയുടെ എട്ടാം ഗഡു ഇന്ന് പ്രധാനമന്ത്രി നരേന്ദ്ര മോദി വിതരണം ചെയ്യും. പദ്ധതി പ്രകാരം രാജ്യത്തെ 9.5 കോടി കർഷകർക്ക് പ്രധാനമന്ത്രി ഇന്ന് 19,000 കോടി രൂപ കൈമാറും.
വീഡിയോ കോൺഫറൻസിംഗ് വഴിയാകും പ്രധാനമന്ത്രി തുക കൈമാറുക. പദ്ധതിയുടെ ഗുണഭോക്താക്കളായ കർഷകരുമായി പ്രധാനമന്ത്രി ഇന്ന് സംവദിക്കും. കേന്ദ്ര കൃഷിമന്ത്രി നരേന്ദ്ര സിംഗ് തോമറും ചടങ്ങിൽ പങ്കെടുക്കും.
അർഹരായ കർഷകർക്ക് പ്രതിവർഷം 6000 രൂപ വീതം നൽകുന്ന പദ്ധതിയാണ് പ്രധാനമന്ത്രി കിസാൻ സമ്മാൻ നിധി. 2000 രൂപ വീതം മൂന്ന് തവണയായാണ് പണം ലഭ്യമാകുക.
ഇടനിലക്കാരില്ലാതെ പണം നേരിട്ടാണ് കർഷകരുടെ അക്കൗണ്ടുകളിലേക്ക് എത്തുക. പദ്ധതി പ്രകാരം പ്രതിവർഷം 1.15 ലക്ഷം കോടി രൂപയാണ് കേന്ദ്ര സർക്കാർ കർഷകർക്കായി നൽകുന്നത്.
