ഡൽഹി: കൊവിഡ് കാലത്ത് ദുരിതമനുഭവിക്കുന്ന ട്രാൻസ്ജെൻഡർ വിഭാഗത്തിന് ധനസഹായം പ്രഖ്യാപിച്ച് കേന്ദ്ര സർക്കാർ. 1500 രൂപയാണ് കേന്ദ്ര സർക്കാർ ഇവർക്കായി നൽകുന്നത്. നിലവിലെ സാഹചര്യത്തിൽ പരാധീനതകൾ അനുഭവിക്കുകയാണ്. അതിൽ പിന്തുണ വേണമെന്ന് കാട്ടി ഇവർ കേന്ദ്ര സാമൂഹിക നീതി സുരക്ഷാ മന്ത്രാലയത്തിന് പരാതി അയച്ചിരുന്നു. ഇത് ശ്രദ്ധയിൽ പെട്ടതിനെ തുടർന്നാണ് നടപടി.
അടിസ്ഥാന ആവശ്യങ്ങൾ നിറവേറ്റുന്നതിനുള്ള അടിയന്തര സഹായമായാണ് തുക അനുവദിച്ചിരിക്കുന്നത്. ആധാറും ബാങ്ക് അക്കൗണ്ട് നമ്പറും സഹിതം https://forms.gle/H3BcREPCy3nG6TpH7 എന്ന അഡ്രസിൽ അപേക്ഷിക്കുന്നവർക്ക് സഹായധനം ലഭിക്കും. നാഷണൽ ഇൻസ്റ്റിറ്റ്യൂട്ട് ഓഫ് സോഷ്യൽ ഡിഫൻസിന്റെ വെബ്സൈറ്റിലും ഈ ഫോം ലഭ്യമാണ്.
സന്നദ്ധ സംഘടനകളുടെ സഹായത്തോടെ ഈ ഫോം സാമൂഹിക മാധ്യമങ്ങൾ വഴി പ്രചരിപ്പിക്കുമെന്ന് മന്ത്രാലയം അറിയിച്ചു. ലോക്ക്ഡൗൺ കാലത്ത് മാനസിക സമ്മർദ്ദം അനുഭവപ്പെടുന്ന ട്രാൻസ്ജെൻഡർ വിഭാഗക്കാർക്കായി ഹെൽപ്പ്ലൈൻ നമ്പറും പുറത്തിറക്കി. 8882133897 എന്ന നമ്പറിൽ തിങ്കൾ മുതൽ ശനി വരെ രാവിലെ 11.00 മുതൽ 1.00 വരെയും വൈകീട്ട് 3.00 മുതൽ 5.00 വരെയും ബന്ധപ്പെടാവുന്നതാണ്.
Discussion about this post