ലഡാക്ക്: കിഴക്കന് ലഡാക്ക് അതിര്ത്തിയില് നിന്നും ചൈനീസ് സൈന്യം പൂര്ണമായും പിന്മാറാതെ സംഘര്ഷത്തിന് ഒരു കുറവുമുണ്ടാകുമെന്ന് പ്രതീക്ഷിക്കേണ്ടെന്ന് ചൈനയ്ക്ക് മുന്നറിപ്പ് നൽകി ഇന്ത്യ. കരസേനാ മേധാവി ജനറല് എം.എം നരവനെയാണ് നയം വ്യക്തമാക്കിയത്. സംഭവിക്കാനിടയുളള എല്ലാ പ്രശ്നങ്ങളെയും നേരിടാന് ഇന്ത്യന് സൈന്യം തയ്യാറാണെന്ന് അദ്ദേഹം അറിയിച്ചു.
കിഴക്കന് ലഡാക്കിലെ പ്രദേശങ്ങളുടെ ഉടമസ്ഥതയെ സംബന്ധിച്ച് ഉറച്ചതും സംശയമില്ലാത്തതുമായ നിലപാടാണ് ഇന്ത്യയ്ക്ക്. ”അതിര്ത്തിയിലെ തന്ത്രപ്രധാനമായ സ്ഥലങ്ങളില് ചൈനീസ് കടന്നുകയറ്റം പ്രതിരോധിക്കാന് മതിയായ സൈനിക വിന്യാസം ഇന്ത്യ നടത്തിയിട്ടുണ്ട്. പ്രശ്നങ്ങളുണ്ടായാല് പകരം സൈനികരെയും തയ്യാറാക്കിയിട്ടുണ്ട്. യഥാര്ത്ഥ നിയന്ത്രണ രേഖയില് സമാധാനവും ശാന്തതയുമാണ് വേണ്ടതെങ്കിലും എന്ത് പ്രശ്നവും നേരിടാന് ഇന്ത്യ തയ്യാറാണ്.” ജനറല് നരവനെ പറഞ്ഞു.
നിലവിലെ സ്ഥിതി തുടര്ന്ന് പോരുന്നുണ്ടെന്നും അതിര്ത്തി പ്രദേശങ്ങളില് കൈയേറ്റം ഉണ്ടായിട്ടില്ലെന്നും അദ്ദേഹം പറഞ്ഞു. ഇന്ത്യ തര്ക്കസ്ഥലത്ത് കരാറുകള് പാലിച്ചു എങ്കിലും ചൈന അനധികൃതമായി ആയുധങ്ങളും നിരവധി സൈനികരെയും രംഗത്തിറക്കി മുന്പ് ഗാല്വാന് വാലിയില് സംഘര്ഷമുണ്ടാക്കിയെന്ന് നരവനെ കൂട്ടിച്ചേർത്തു. ഗാല്വന് വാലിയിലെ സംഘര്ഷത്തെ തുടര്ന്ന് ഇരുവിഭാഗവും കൂടുതല് സൈന്യത്തെ രംഗത്തിറക്കുകയും വലിയ സംഘട്ടനം തന്നെ ഉണ്ടാകുകയുമായിരുന്നു. തുടര്ന്ന് ശക്തമായ ആയുധങ്ങളും ടാങ്കുകളും ഇന്ത്യ ഇവിടെ വിന്യസിച്ചു.
എന്നാല് പാങ്കോംഗ് തടാകത്തിലെ പ്രശ്നത്തെ തുടര്ന്നുണ്ടായ ചര്ച്ചകള്ക്ക് ശേഷം ചൈന പ്രകോപനമൊന്നും സൃഷ്ടിച്ചിട്ടില്ലെന്ന് നരവനെ പറഞ്ഞു. അതിനാല് ഇപ്പോള് സംഘര്ഷ സാദ്ധ്യത കുറവാണെന്നും അദ്ദേഹം അറിയിച്ചു.
നിലവില് 50,000 മുതല് 60,000 വരെ സൈനികരെയാണ് ഇരു രാജ്യങ്ങളും യഥാര്ത്ഥ നിയന്ത്രണ രേഖയില് വിന്യസിച്ചിരിക്കുന്നത്. അടുത്ത ഘട്ടം സൈനിക ചര്ച്ച ഉടന് നടക്കും. അരുണാചല് പ്രദേശിനോട് ചേര്ന്ന ചൈനീസ് ഭാഗങ്ങളില് ചൈന ഗ്രാമങ്ങള് നിര്മ്മിക്കുകയാണ്. ഇന്ത്യയും ഇവിടെ അടിസ്ഥാന സൗകര്യ വികസനം നടത്തുന്നുണ്ട്.
സംഘര്ഷത്തിന് ഒന്പത് മാസത്തിന് ശേഷമാണ് ഇരുവിഭാഗവും സൈനികരെ പിന്വലിക്കാന് ആരംഭിച്ചത്. ഇതുവരെ ഇന്ത്യ-ചൈന സൈനികതല ചര്ച്ച പതിനൊന്ന് റൗണ്ടുകള് പിന്നിട്ടു.
Discussion about this post