ഡൽഹി: ജമ്മു കശ്മീരിൽ കഴിഞ്ഞ മാസം ഉണ്ടായ ഡ്രോൺ ആക്രമണങ്ങളുടെ പശ്ചാത്തലത്തിൽ രാജ്യത്തെ മറ്റ് സംസ്ഥാനങ്ങൾക്കും രഹസ്യാന്വേഷണ വിഭാഗം മുന്നറിയിപ്പ് നൽകി. കേരളത്തിലും തമിഴ്നാട്ടിലും അതീവ ജാഗ്രതാ നിർദേശമാണ് നൽകിയിരിക്കുന്നത്.
തീവ്രവാദ സ്വഭാവമുള്ള സംഘടനകൾ ഡ്രോൺ ഉപയോഗിച്ച് സംസ്ഥാനങ്ങളിലേക്ക് നുഴഞ്ഞുകയറാനുള്ള സാധ്യതയുണ്ടെന്ന് കേന്ദ്ര ഏജൻസികൾ മുന്നറിയിപ്പ് നൽകുന്നു. താലിബാൻ അടക്കമുള്ള സംഘടനകൾ ആക്രമണം നടത്താനുള്ള സാധ്യതകളും രഹസ്യാന്വേഷണ വിഭാഗം മുന്നിൽ കാണുന്നുണ്ട്.
കേരളത്തിന്റെ തെക്കൻ മേഖലകൾ കേന്ദ്രികരിച്ചാണ് സുരക്ഷ കൂടുതൽ ശക്തമാക്കാൻ നിർദേശം നൽകിയിട്ടുള്ളത്. ശ്രീലങ്കൻ തുറമുഖമായ അമ്പംതോറ ചൈനീസ് നിയന്ത്രണത്തിലേക്ക് മാറിയതും ജാഗ്രത നിർദേശത്തിനു കാരണമായിട്ടുണ്ട്. തീവ്രവാദസംഘടനകളുമായി ചേർന്ന് പ്രവർത്തിക്കാനായി കേരളത്തിൽ നിന്ന് സിറിയയിലേക്കും അഫ്ഗാനിസ്ഥിലേക്കും ആളുകൾ പോയതും ഏജൻസികൾ പരിഗണിക്കുന്നുണ്ട്.
കോയമ്പത്തൂർ, തിരുച്ചിറപ്പള്ളി, കന്യാകുമാരി, തമിഴ്നാട്ടിലെ മറ്റ് തെക്കൻ ജില്ലകൾ എന്നിവിടങ്ങളിലെ സംഘടനകളുടെ പ്രവർത്തനങ്ങളും ഏജൻസികൾ പരിശോധിക്കുന്നുണ്ട്. തമിഴ്നാടിന്റെയും കേരളത്തിന്റേയും തെക്കൻ തീരദേശമേഖലയിൽ നാവികസേനയും തീരസുരക്ഷാസേനയും ജാഗ്രതയും നിരീക്ഷണവും ശക്തമാക്കിയിട്ടുണ്ട്. കേരളത്തിൽ കോന്നി, പത്തനാപുരം എന്നിവിടങ്ങളിൽ അടുത്തിടെ ഉണ്ടായ തീവ്രവാദ സംഘടനകളുടെ സാന്നിധ്യം കേന്ദ്ര ഏജൻസികൾ ഗൗരവമായിട്ടാണ് കാണുന്നത്.
അങ്കമാലിയിൽ നിന്ന് മൂന്ന് ശ്രീലങ്കൻ സ്വദേശികളെ തമിഴ്നാട് ക്യൂ ബ്രാഞ്ച് പിടികൂടിയിരുന്നു. മയക്കുമരുന്ന് കടത്തിനാണ് ഇവരെ അറസ്റ്റ് ചെയ്തത് എങ്കിലും മുന്നറിയിപ്പിന്റെ പശ്ചാത്തലത്തിൽ കൂടുതൽ ചോദ്യം ചെയ്യലിന് വിധേയരാക്കും.
അതേസമയം ജമ്മുകശ്മീരിലെ വ്യോമതാവളത്തിൽ ഞായറാഴ്ച ഉണ്ടായ ആക്രമണത്തിൽ ദേശിയ ഏജൻസികളുടെ നേതൃത്വത്തിൽ അന്വേഷണം പുരോഗമിക്കുകയാണ്. ലഷ്കർ ഈ തൊയ്ബയാണ് ആക്രമണത്തിനു പിന്നിൽ എന്നാണ് വിലയിരുത്തൽ. ആക്രമണത്തിന് ശേഷവും വ്യോമത്താവളത്തിന് സമീപം തുടർച്ചയായി ഡ്രോണുകൾ കണ്ടെത്തിയിരുന്നു. കശ്മീരിൽ തന്നെ വിവിധ ഇടങ്ങളിൽ ആയി അഞ്ചിലധികം ഡ്രോണുകൾ കൂടി കണ്ടെത്തിയിരുന്നു.
Discussion about this post