നടനും അതുല്യകലാകാരനുമായ നെടുമുടി വേണു അന്തരിച്ചു. 73 വയസായിരുന്നു. ഉദരസംബന്ധമായ അസുഖത്തെ തുടര്ന്ന് ശസ്ത്രക്രിക്ക് വിധേയനായി ആശുപത്രിയില് കഴിയവെയാണ് അന്ത്യം. തിരുവനന്തപുരം സ്വകാര്യ ആശുപത്രിയിൽ ചികിത്സയിലിരിക്കെയാണ് മരണം.
തിയേറ്ററിലും ഡിജിറ്റല് പ്ലാറ്റുഫോമിലും പ്രദര്ശനത്തിനെത്തിയ ‘ആണും പെണ്ണും’ എന്ന സിനിമയിലാണ് അദ്ദേഹം ഏറ്റവും അടുത്തായി അഭിനയിച്ചത്. ഡോ: ബിജു സംവിധാനം ചെയ്യുന്ന ‘ഓറഞ്ച് മരങ്ങളുടെ വീട്’ എന്ന സിനിമയിലും പ്രധാനവേഷം ചെയ്തിട്ടുണ്ട്. കമല് ഹാസന്റെ ‘ഇന്ത്യന് 2’ ലും അദ്ദേഹം വേഷമിടും എന്ന് വാര്ത്ത വന്നിരുന്നു. തിയേറ്റര് റിലീസ് പ്രതീക്ഷിക്കുന്ന ‘മരയ്ക്കാര്: അറബിക്കടലിന്റെ സിംഹം’ സിനിമയിലും അദ്ദേഹം അഭിനയിച്ചിട്ടുണ്ട്.
ആലപ്പുഴ ജില്ലയിലെ നെടുമുടിയില് സ്കൂള് അദ്ധ്യാപകനായിരുന്ന പി.കെ കേശവന് പിള്ളയുടെയും കുഞ്ഞിക്കുട്ടി അമ്മയുടെയും അഞ്ച് ആണ്മക്കളില് ഇളയ മകനായി 1948 മെയ് 22നാണ് കെ. വേണുഗോപാലന് എന്ന നെടുമുടി വേണു ജനിച്ചത്. നെടുമുടിയിലെ എന്.എസ്.എസ്. ഹയര് സെക്കന്ഡറി സ്കൂള്, ചമ്പക്കുളം സെന്റ് മേരീസ് ഹയര് സെക്കന്ഡറി സ്കൂള് എന്നിവിടങ്ങളില് നിന്നാണ് അദ്ദേഹം പ്രാഥമിക വിദ്യാഭ്യാസം നേടിയത്. അദ്ദേഹത്തിന് നാല് മൂത്ത സഹോദരന്മാരുണ്ട്.
വിദ്യാഭ്യാസ കാലത്ത് സാംസ്കാരിക പ്രവര്ത്തനങ്ങളില് സജീവമായിരുന്നു അദ്ദേഹം. ആലപ്പുഴ എസ്. ഡി കോളേജില് നിന്ന് ബിരുദമെടുത്തശേഷം കലാകൗമുദിയില് പത്ര പ്രവര്ത്തകനായും ആലപ്പുഴയില് പാരലല് കോളേജ് അദ്ധ്യാപകനായും പ്രവര്ത്തിച്ചു.
നാടകരംഗത്ത് സജീവമായിരിക്കെയാണ് നെടുമുടി സിനിമയില് എത്തിയത്. തിരുവനന്തപുരത്തേക്ക് താമസം മാറ്റിയതോടെ അരവിന്ദന്, പത്മരാജന്, ഭരത് ഗോപി തുടങ്ങിയവരുമായി സൗഹൃദത്തിലായി.
ഇത് ആത്യന്തികമായി അദ്ദേഹത്തിന്റെ സിനിമാ ജീവിതത്തിന് വഴിയൊരുക്കി. ജയന് മരിക്കുകയും മലയാള സിനിമയില് നവോത്ഥാാനം സംഭവിക്കുകയും ചെയ്ത സമയത്താണ് നിയോഗം പോലെ നെടുമുടി ചലച്ചിത്ര ലോകത്ത് എത്തുന്നത്. സമര്ത്ഥനായ ഒരു മൃദംഗം വായനക്കാരന്കൂടിയാണ് അദ്ദേഹം.
അഭിനയത്തിനു പുറമെ ഏതാനും സിനിമകള്ക്കു വേണ്ടി കഥയും എഴുതിയിട്ടുമുണ്ട്. 1978-ല് അരവിന്ദന് സംവിധാനം ചെയ്ത തമ്പ് എന്ന ചിത്രത്തിലൂടെ ആയിരുന്നു അരങ്ങേറ്റം. ഭരതന്റെ ആരവം എന്ന ചിത്രത്തിലെ വേഷം ശ്രദ്ധേയമായി.
പത്മരാജന്റെ ഒരിടത്തൊരു ഫയല്വാന് എന്ന ചിത്രം കാരണവര് വേഷങ്ങളിലേക്കുള്ള ചുവടു മാറ്റത്തിനു നാന്ദിയായി. വൈകാതെ മലയാളത്തിലെ തിരക്കേറിയ സഹനടന്മാരില് ഒരാളായി മാറുകയായിരുന്നു.
സിനിമയിലെ വിവിധ പ്രകടനങ്ങള്ക്ക് രണ്ട് ദേശീയ ചലച്ചിത്ര അവാര്ഡുകളും ആറ് കേരള സംസ്ഥാന ചലച്ചിത്ര അവാര്ഡുകളും അദ്ദേഹം നേടിയിട്ടുണ്ട്.
Discussion about this post