ആലപ്പുഴ: പെട്ടി ഓട്ടോയുടെ വാതില്‍ ചില്ലില്‍ തലകുടുങ്ങിയ നാല് വയസുകാരന് കഴുത്ത് മുറുകി മരിച്ചു. ആലപ്പുഴ പുന്നപ്ര കുറവന്‍തോട് മണ്ണാന്‍പറമ്പിൽ ഉമറുല്‍ അത്താബിന്റെയും അന്‍സിലയുടെയും മകനായ മുഹമ്മദ് ഹനാനാണ് ദാരുണമായി മരണമടഞ്ഞത്.
വീട്ടില്‍ നിര്‍ത്തിയിട്ടിരുന്ന പെട്ടി ഓട്ടോയുടെ മുന്‍ചക്രത്തില്‍ക്കയറിയ ഹനാന്, വാതിലിന്റെ പകുതിയടഞ്ഞ ചില്ലിനു മുകളിലൂടെ അകത്തേക്കു തലയിട്ടപ്പോള്‍ കാല്‍വഴുതിപ്പോവുകയായിരുന്നു.
ആക്രിക്കട നടത്തുന്ന അത്താബ്, ഊണുകഴിക്കാന്‍ ഈ വാഹനത്തില്‍ വീട്ടിലെത്തിയപ്പോഴായിരുന്നു സംഭവം. ഹനാന് അപകടം പറ്റിയ സമയത്ത് അത്താബും ഭാര്യയും വീട്ടിനുള്ളിലായിരുന്നു. കുട്ടിയുടെ ശബ്‌ദമൊന്നും കേള്‍ക്കാത്തതിനാല്‍ അന്വേഷിച്ചെത്തിയ മാതാപിതാക്കള്‍ വണ്ടിയുടെ ചില്ലിന് മുകളില്‍ തലകുടുങ്ങിയ കുട്ടിയെ കണ്ടു. ഉടനെ ആലപ്പുഴയിലെ മെഡിക്കല്‍ കോളേജില്‍ എത്തിച്ചെങ്കിലും മരണമടഞ്ഞു.
