കൊച്ചി: പി.എസ്.സി പരീക്ഷാ ക്രമക്കേട് കേസില്‍ സര്‍ക്കാരും പിഎസ്സിയും ഒത്തുകളിച്ച് പ്രധാന പ്രതികളെ സംരക്ഷിക്കാന്‍ നടത്തുന്ന നാണംകെട്ട നീക്കങ്ങളാണ് ഹൈക്കോടതിയുടെ രൂക്ഷവിമര്‍ശനത്തിലൂടെ തുറന്നുകാട്ടപ്പെട്ടിരിക്കുന്നതെന്ന് ട്വന്റി20 പാര്‍ട്ടി സംസ്ഥാന അധ്യക്ഷന്‍ സാബു എം. ജേക്കബ്. പ്രധാന പ്രതിയെ ചോദ്യം ചെയ്യാതെ എന്ത് അന്വേഷണമാണ് ക്രൈംബ്രാഞ്ച് നടത്തുന്നതെന്നും, പ്രധാന കേസുകളില്‍ സര്‍ക്കാരും പ്രതിപക്ഷവും ‘ഭായ്-ഭായ്’ കളിച്ചാല്‍ ജനങ്ങള്‍ക്ക് സംശയം തോന്നുക സ്വാഭാവികമാണെന്നുമുള്ള ബഹുമാനപ്പെട്ട ഹൈക്കോടതിയുടെ പരാമര്‍ശം സര്‍ക്കാരിന്റെ മുഖത്തേറ്റ കനത്ത പ്രഹരമാണ്.
സ്വന്തം അധ്വാനവും പ്രതീക്ഷകളും പണയംവെച്ച് രാപ്പകലില്ലാതെ പഠിച്ച് പരീക്ഷയെഴുതുന്ന ലക്ഷക്കണക്കിന് സാധാരണക്കാരായ ഉദ്യോഗാര്‍ത്ഥികളുടെ ജീവിതം വെച്ചാണ് ഭരണകൂടവും പിഎസ്സി നേതൃത്വവും പന്താടുന്നത്. പരീക്ഷയിലെ ക്രമക്കേടുകള്‍ വെറുമൊരു ക്ലറിക്കല്‍ പിഴവല്ലെന്നും ബോധപൂര്‍വ്വമായ തട്ടിപ്പാണെന്നും ക്രൈംബ്രാഞ്ച് റിപ്പോര്‍ട്ട് ഉണ്ടായിട്ടും, അന്വേഷണത്തോട് സഹകരിക്കാതെ കേസ് അട്ടിമറിക്കാനാണ് പിഎസ്സി ശ്രമിക്കുന്നത്. അഴിമതി നിരോധന നിയമത്തിലെ സെക്ഷന്‍ 17(എ) ചൂണ്ടിക്കാട്ടി അന്വേഷണം തന്നെ റദ്ദാക്കണമെന്ന് പിഎസ്സി ഹൈക്കോടതിയില്‍ വാദിക്കുന്നത് ആരെ സംരക്ഷിക്കാനാണെന്ന് വ്യക്തമാക്കണം.
സര്‍ക്കാര്‍ സര്‍വീസിലെ പിന്‍വാതില്‍ നിയമനങ്ങള്‍ക്കും ക്രമക്കേടുകള്‍ക്കും ചൂട്ടുപിടിക്കുന്ന കേന്ദ്രമായി പിഎസ്സി അധഃപതിച്ചിരിക്കുന്നു. ക്രമക്കേടിന്റെ പ്രധാന സൂത്രധാരന്മാരിലേക്ക് അന്വേഷണം എത്താതിരിക്കാന്‍ സര്‍ക്കാരും പിഎസ്സിയും ഒത്തുകളിക്കുകയാണ്. പ്രതികളെ സംരക്ഷിക്കുന്ന ഈ കൂട്ടുകച്ചവടം അടിയന്തരമായി അവസാനിപ്പിക്കണം. നീതിക്കുവേണ്ടി സമരം ചെയ്യുന്ന ഉദ്യോഗാര്‍ത്ഥികള്‍ക്കൊപ്പം ട്വന്റി20 ഉറച്ചുനില്‍ക്കുമെന്നും അദ്ദേഹം വ്യക്തമാക്കി.
ലക്ഷക്കണക്കിന് ഉദ്യോഗാര്‍ത്ഥികളുടെ ഏക ആശ്രയമായ പിഎസ്സിയെ സര്‍ക്കാര്‍ പിന്‍വാതില്‍ പരീക്ഷണകേന്ദ്രമാക്കരുത്. കഷ്ടപ്പെട്ട് പഠിച്ച് പരീക്ഷകളില്‍ ഒന്നാം റാങ്ക് നേടുന്നവര്‍ക്ക് പോലും നിയമനം ലഭിക്കാത്ത ദയനീയ സാഹചര്യമാണ് കേരളത്തിലുള്ളത്. നിലവിലെ എല്‍ഡിസി റാങ്ക് ലിസ്റ്റിന്റെ കാലാവധി ഒരു വര്‍ഷം പൂര്‍ത്തിയായിട്ടും പല ജില്ലകളിലും 100 നിയമനങ്ങള്‍ പോലും നടന്നിട്ടില്ല. സംസ്ഥാനത്ത് നിലനില്‍ക്കുന്ന അപ്രഖ്യാപിത നിയമന നിരോധനവും രാഷ്ട്രീയ സമ്മര്‍ദ്ദത്താല്‍ നടക്കുന്ന പിന്‍വാതില്‍ നിയമനങ്ങളും കേരളത്തിലെ അഭ്യസ്തവിദ്യരായ ഉദ്യോഗാര്‍ത്ഥികളുടെ മനോവീര്യം തകര്‍ക്കുകയാണെന്നും അദ്ദേഹം കൂട്ടിച്ചേര്‍ത്തു.
