കണ്ണൂര്‍: സി പി എമ്മിന്റെ നിയന്ത്രണത്തിലുള്ള പേരാവൂര്‍ ഹൗസ് ബില്‍ഡിംഗ് സൊസൈറ്റിയുടെ പ്രവര്‍ത്തനത്തില്‍ വ്യാപക ക്രമക്കേടുകള്‍ . ചിട്ടി തട്ടിപ്പിന് പുറമേ ലതര്‍ ബാഗ് നിര്മാണത്തിലും ക്രമക്കേടുകള്‍ നടത്തിയിട്ടുള്ളതായി സഹകരണ വകുപ്പ് നടത്തിയ അന്വേഷണത്തില്‍ കണ്ടെത്തി. മതിയായ ഈടില്ലാതെ വായ്പകള്‍ നല്‍കിയതും സൊസൈറ്റിക്ക് ബാദ്ധ്യതയായതായി കണ്ടെത്തിയിട്ടുണ്ട്. സെക്രട്ടറി പി വി ഹരിദാസിന്റെ മൊഴി അനുസരിച്ച്‌ സൊസൈറ്റിയുടെ എല്ലാ തീരുമാനങ്ങളും ഭരണസമിതിയുടെ അറിവോടെയായിരുന്നു.
അന്വേഷണ റിപ്പോര്‍ട്ട് ഉടന്‍ ജോയിന്റ് രജിസ്ട്രാര്‍ക്കു കൈമാറും. തട്ടിപ്പ് നടത്തിയവരില്‍ നിന്ന് പണം ഈടാക്കണമെന്ന് റിപ്പോര്‍ട്ടില്‍ ശുപാര്‍ശയുണ്ടാകുമെന്ന് അസിസ്റ്റന്റ് രജിസ്ട്രാര്‍ കെ പ്രദോഷ് കുമാര്‍ മാദ്ധ്യമങ്ങളോട് പറഞ്ഞു. തട്ടിപ്പില്‍ പൊലീസ് കേസ് വേണമോ എന്ന് റിപ്പോര്‍ട്ട് പഠിച്ചശേഷം ജോയിന്റ് രജിസ്ട്രാര്‍ തീരുമാനിക്കും.
അതിനിടെ, പേരാവൂര്‍ സൊസൈറ്റി മുന്‍ പ്രസിഡന്റ് എ പ്രിയന്റെ വീട്ടിലേക്ക് നിക്ഷേപകര്‍ മാര്‍ച്ച്‌ നടത്തി. സി പി എം ലോക്കല്‍ സെക്രട്ടറി കൂടിയായ പ്രിയന് തട്ടിപ്പില്‍ പങ്കുണ്ടെന്നാണ് ആക്ഷേപം.
Discussion about this post