കറാച്ചി: ഇന്ത്യ – പാകിസ്ഥാന്‍ മത്സരത്തിനു ശേഷം വിവാദ പ്രസ്താവനയുമായി മുന്‍ പാകിസ്ഥാന്‍ ക്യാപ്ടന്‍ വഖാര്‍ യൂനിസ്. ഇന്ത്യ – പാകിസ്ഥാന്‍ മത്സരത്തില്‍ തന്നെ ഏറെ സന്തോഷിപ്പിച്ചത് ചുറ്റും കൂടി നില്‍ക്കുന്ന ഹിന്ദുക്കളുടെ ഇടയില്‍ നിന്ന് നിസ്കരിക്കുന്ന മുഹമ്മദ് റിസ്വാന്റെ ചിത്രമാണെന്നാണ് വഖാര്‍ യൂനിസ് പറഞ്ഞത്. സംഭവം വിവാദമായതോടെ അദ്ദേഹം തന്റെ പ്രസ്താവന പിന്‍വലിച്ച്‌ മാപ്പ് പറഞ്ഞു. ലോകകപ്പില്‍ ഇന്ത്യയെ പാകിസ്ഥാന്‍ പരാജയപ്പെടുത്തിയതിന് ശേഷം ഒരു പ്രാദേശിക ടെലിവിഷന്‍ ചര്‍ച്ചയില്‍ പങ്കെടുത്ത് സംസാരിക്കുമ്പോഴായിരുന്നു വഖാര്‍ യൂനിസ് ഇത്തരമൊരു പരാമ‌ര്‍ശം നടത്തിയത്.
ബാബറും റിസ്‌വാനും ബാറ്റ് ചെയ്ത രീതി, സ്‌ട്രൈക്ക് റൊട്ടേഷന്‍, അവരുടെ മുഖത്തെ ഭാവം എന്നിവ അതിശയിപ്പിക്കുന്നതായിരുന്നു. എന്നാല്‍ റിസ്വാന്‍ ചെയ്തതില്‍ ഏറ്റവും നല്ല കാര്യം ഹിന്ദുക്കളാല്‍ ചുറ്റപ്പെട്ട മൈതാനത്ത് നിസ്കരിച്ചുവെന്നതാണ്. അത് വളരെ പ്രത്യേകതയുള്ള പ്രവൃത്തിയായിരുന്നുവെന്നാണ് വഖാര്‍ പറഞ്ഞത്. ഇതിനെതിരെ ഹര്‍ഷാ ഭോഗ്‌ലെയും ആകാശ് ചോപ്രയും അടക്കമുള്ളവര്‍ രംഗത്തെത്തിയതോടെ വഖാര്‍ മാപ്പ് പറയുകയായിരുന്നു. ചര്‍ച്ചയ്ക്കിടയിലെ ആവേശത്തില്‍ പറഞ്ഞുപോയതാണെന്നും തന്റെ വാക്കുകള്‍ ആരെയെങ്കിലും വേദനിപ്പിച്ചിട്ടുണ്ടെങ്കില്‍ ക്ഷമ ചോദിക്കുന്നുവെന്നും വഖാര്‍ ട്വീറ്റ് ചെയ്തു.
പത്ത് വിക്കറ്റിനാണ് പാകിസ്ഥാന്‍ ഇന്ത്യയെ പരാജയപ്പെടുത്തിയത്. ഇത് ആദ്യമായാണ് പാകിസ്ഥാന്‍ ഇന്ത്യയെ ലോകകപ്പില്‍ പരാജയപ്പെടുന്നത്. കൂടാതെ ആദ്യമായാണ് പാകിസ്ഥാന്‍ ടി ട്വന്റി ക്രിക്കറ്റില്‍ പത്ത് വിക്കറ്റിന്റെ വിജയം സ്വന്തമാക്കുന്നത്.
Discussion about this post