ഡൽഹി: രാഷ്ട്രീയ ഗതിവിഗതികൾ കാര്യമായെടുത്തില്ലെങ്കിൽ നരേന്ദ്ര മോദി കൂടുതൽ ശക്തിയാർജ്ജിക്കുമെന്ന് പശ്ചിമ ബംഗാൾ മുഖ്യമന്ത്രി മമത ബാനർജി. ഇത് കോൺഗ്രസിനുള്ള മുന്നറിയിപ്പാണെന്ന് പറഞ്ഞ മമത, കോൺഗ്രസിന്റെ നിസ്സംഗത കാരണം രാജ്യം ദുരിതത്തിലായെന്നും കുറ്റപ്പെടുത്തി. കോൺഗ്രസിന് തീരുമാനങ്ങൾ എടുക്കാനുള്ള കഴിവില്ലെന്നും മമത പരിഹസിച്ചു.
കോൺഗ്രസ് രാഷ്ട്രീയത്തെ കാര്യമായി എടുക്കുന്നില്ല. കോൺഗ്രസ് കാരണം മോദിജി കൂടുതൽ കരുത്താർജ്ജിക്കുന്ന ലക്ഷണമാണ് കാണുന്നത്. കോൺഗ്രസ് അവസരങ്ങൾ തുലച്ചുവെന്നും മമത ആരോപിച്ചു.
കോൺഗ്രസിലെ കാര്യങ്ങൾ തന്നെ ബാധിക്കുന്നില്ല. ബംഗാളിൽ മൂന്ന് തവണ സർക്കാർ രൂപീകരിച്ചതും ആരുടെയും സഹായമില്ലാതെയായിരുന്നു. മറ്റുള്ള പാർട്ടികളുടെ കാര്യങ്ങൾ പറയാൻ തനിക്ക് കൂടുതൽ താത്പര്യമില്ലെന്നും മമത പറഞ്ഞു. ഗോവയിൽ മാധ്യമപ്രവർത്തകരോട് സംസാരിക്കുകയായിരുന്നു അവർ.
