മുംബൈ: മഹാരാഷ്ട്രയില് മകളെ വിവാഹം കഴിച്ചതിന്റെ പേരില് 57കാരനായ കാമുകനെ 70കാരി ചുറ്റികകൊണ്ട് തലക്കടിച്ച് കൊന്നു. മുംബൈ വടാലയിലാണ് സംഭവം. 57കാരനായ ബിമല് ഖന്നയെയാണ് കാമുകി ശാന്തി പാല് കൊലപ്പെടുത്തിയത്. ബുധനാഴ്ച ശാന്തി പാലിനെ പൊലീസ് അറസ്റ്റ് ചെയ്തു.
വര്ഷങ്ങളായി ശാന്തി പാലും ബിമല് ഖന്നയും ഒരുമിച്ചാണ് താമസം. ദിവസങ്ങള്ക്ക് മുമ്പ് 70കാരിയുടെ ആദ്യ വിവാഹത്തിലുണ്ടായ മകളെ ബിമല് ഖന്ന വിവാഹം കഴിച്ചു. ഇതിനെ തുടര്ന്നുണ്ടായ പകയാണ് കൊലക്ക് കാരണം.
ചൊവ്വാഴ്ച രാത്രി ശാന്തി പാലും ഖന്നയും തമ്മില് വിവാഹത്തെ ചൊല്ലി ബഹളമുണ്ടായിരുന്നു. ഖന്ന തന്റെ മകളുടെ ജീവിതം നശിപ്പിച്ചുവെന്ന് ആരോപിച്ചായിരുന്നു ബഹളം. ബഹളത്തിനിടെ ശാന്തി പാല് 57കാരന്റെ തലക്ക് ചുറ്റിക കൊണ്ട് അടിക്കുകയായിരുന്നു. അടിയേറ്റയുടന് ബിമല് ഖന്ന ബോധരഹിതനായി. നേരത്തേ, ഇയാള്ക്ക് മസ്തിഷ്കാഘാതം വന്നതിനെ തുടര്ന്ന് ചികിത്സ തേടിയിരുന്നു. പിറ്റേ ദിവസം രാവിലെ ശാന്തിപാല് ഖന്നയെ ആശുപത്രിയിലെത്തിച്ചെങ്കിലും മരിച്ചിരുന്നു.
കുഴഞ്ഞുവീണതിനെ തുടര്ന്നാണ് ഖന്നക്ക് പരിക്കേറ്റതെന്ന് 70കാരി ആശുപത്രിയില് അറിയിച്ചിരുന്നു. എന്നാല്, പോസ്റ്റ്മോര്ട്ടം റിപ്പോര്ട്ടില് ശരീരത്തില് മാരകമായി പരിക്കേറ്റതായി തെളിഞ്ഞു. ഇതോടെ ആശുപത്രി അധികൃതര് പൊലീസിനെ വിവരം അറിയിച്ചു. ചോദ്യം ചെയ്യലിനിടെ ശാന്തിപാല് കുറ്റകൃത്യം സമ്മതിക്കുകയായിരുന്നു.
1984ലെ സിഖ് കലാപത്തിന് പിന്നാലെയാണ് ശാന്തിപാലും ആദ്യ വിവാഹത്തിലെ മകളും പഞ്ചാബില്നിന്ന് മുംബൈയിലെത്തുന്നത്. തുടര്ന്ന് ഖന്നയുമായി പരിചയപ്പെട്ടു. ഇയാള് ശാന്തിക്കും മകള്ക്കും അഭയം നല്കി. ശാന്തിക്കും ഖന്നയ്ക്കും മറ്റൊരു മകള് ജനിക്കുകയും ചെയ്തു. ഇവര് തമ്മില് വിവാഹം കഴിച്ചിരുന്നില്ല. ഇതിനു പിന്നാലെയാണ് ശാന്തിപാലിന്റെ ആദ്യ വിവാഹത്തിലെ മകളെ ഖന്ന വിവാഹം കഴിക്കുന്നത്.
Discussion about this post