ബംഗലൂരു: കോൺഗ്രസ് പദയാത്രക്കിടെ ശാരീരിക ആസ്വാസ്ഥ്യം അനുഭവപ്പെട്ടിട്ടും കൊവിഡ് പരിശോധനക്ക് വിധേയനാകാതെ കർണാടക കോൺഗ്രസ് അധ്യക്ഷൻ ഡി കെ ശിവകുമാർ. 165 കിലോമീറ്റർ പദയാത്ര ഉദ്ഘാടനം ചെയ്ത ശേഷമായിരുന്നു ഡി കെ ശിവകുമാർ കൊവിഡ് പരിശോധിക്കാൻ ആവശ്യപ്പെട്ടവരോട് തട്ടിക്കയറിയത്. ഇതിന്റെ വീഡിയോ സാമൂഹിക മാധ്യമങ്ങളിൽ പ്രചരിക്കുകയാണ്.
‘എനിക്ക് അസുഖമൊന്നുമില്ല. സാമ്പിൾ എടുക്കാൻ നിങ്ങൾക്ക് എന്നെ നിർബന്ധിക്കാനാവില്ല. നാട്ടിലെ നിയമം എനിക്കും അറിയാം. നിങ്ങളുടെ ആഭ്യന്തര മന്ത്രിയോട് പറഞ്ഞേക്കൂ എനിക്ക് കുഴപ്പമൊന്നുമില്ലെന്ന്.‘ കൊവിഡ് വ്യാപനം രൂക്ഷമായിരിക്കുന്ന സാഹചര്യത്തിൽ ഇതായിരുന്നു ശിവകുമാറിന്റെ പ്രതികരണം.
സംഭവത്തിൽ രൂക്ഷ വിമർശനവുമായി ബിജെപി രംഗത്ത് വന്നു. പഞ്ചാബിലായാലും കർണാടകയിൽ ആയാലും കോൺഗ്രസ് കൊവിഡ് നിയന്ത്രണങ്ങൾ ലംഘിക്കുകയാണ്. ഇതിന് പിന്നിൽ ഗൂഢാലോചനയുണ്ട്. കാലാകാലങ്ങളായി അവർ അധികാരത്തിൽ നിന്നും പുറത്താണ്. ഈ അടുത്ത സമയത്തെങ്ങും അധികാരം തിരിച്ചു പിടിക്കാനും പോകുന്നില്ല. അതിന്റെ നിരാശയിലാണ് അവർ ഇതൊക്കെ കാട്ടിക്കൂട്ടുന്നത് എന്ന് ബിജെപി നേതാവ് ബി എൽ സന്തോഷ് ആരോപിച്ചു.
Discussion about this post