കോട്ടയം: കോട്ടയം മോനിപ്പള്ളിയില് കാറും ടോറസും കൂട്ടിയിടിച്ച് 2 പേർ മരിച്ചു. പത്തനംതിട്ട അടൂര് സ്വദേശികളായ മനോജ്, കുട്ടന് എന്നിവരാണ് മരിച്ചത്. ചൊവ്വാഴ്ച പുലര്ച്ചെ അഞ്ചരയോടെ ആയിരുന്നു അപകടം.
ബന്ധുവിനെ വിമാനത്താവളത്തിലാക്കി മടങ്ങുകയായിരുന്നു മനോജും കുട്ടനും. കുറവിലങ്ങാടിനു സമീപം മോനിപ്പള്ളിയില് വെച്ചാണ് നിയന്ത്രണംവിട്ട കാറും ടോറസും തമ്മില് കൂട്ടിയിടിച്ചത്. അപകടത്തില് കാറിന്റെ മുന്ഭാഗം പൂര്ണമായി തകര്ന്ന നിലയിലായിരുന്നു.
കാറ് വെട്ടിപ്പൊളിച്ചാണ് മനോജിനെയും കുട്ടനെയും പുറത്തെടുത്തത്. എന്നാല് അപ്പോഴേക്കും മരണം സംഭവിച്ചിരുന്നു. കാറില് ഇടിച്ചതിനു പിന്നാലെ ടോറസ് നിയന്ത്രണംവിട്ട് സമീപത്തെ തോട്ടിലേക്ക് പതിച്ചു.
നാട്ടുകാര് വിവരം അറിയിച്ചതിനെ തുടര്ന്ന് കുറവിലങ്ങാട് പോലീസും അഗ്നിരക്ഷാസേനയും സ്ഥലത്തെത്തി. ഇവരാണ് ടോറസിനുള്ളില്നിന്ന് ഡ്രൈവറെയും കാര് യാത്രികരെയും പുറത്തെത്തിച്ചത്. ടോറസ് ഡ്രൈവര് സോമനും പരിക്കേറ്റിട്ടുണ്ട്. ഇദ്ദേഹവും ചികിത്സയിലാണ്.
Discussion about this post