ഗാന്ധിനഗർ: ഗുജറാത്തിൽ 3500 ആം ആദ്മി പാർട്ടി പ്രവർത്തകർ ബിജെപിയിൽ ചേർന്നു. ഗാന്ധിനഗറിലെ ബിജെപി ആസ്ഥാനത്ത് ബിജെപി സംസ്ഥാന അധ്യക്ഷൻ സി ആർ പാട്ടീലിന്റെ സാന്നിദ്ധ്യത്തിലായിരുന്നു ആം ആദ്മി പാർട്ടി പ്രവർത്തകർ ബിജെപി അംഗത്വം സ്വീകരിച്ചത്. നിയമസഭാ തെരഞ്ഞെടുപ്പ് അടുത്തിരിക്കെ ഗുജറാത്തിൽ ആം ആദ്മി പാർട്ടിക്ക് കനത്ത തിരിച്ചടിയായി പ്രവർത്തകരുടെ ബിജെപി പ്രവേശനം.
പാർട്ടി മാറിയതിന്റെ പ്രതീകമായി പ്രവർത്തകർ ആം ആദ്മി പാർട്ടി തൊപ്പി മാറ്റി ബിജെപി തൊപ്പി വെച്ചു. നേരത്തെ, ബിജെപി പ്രവർത്തകർ ആം ആദ്മി പാർട്ടിയിൽ ചേരണമെന്ന് ഡൽഹി മുഖ്യമന്ത്രി അരവിന്ദ് കെജരിവാൾ ആഹ്വാനം ചെയ്തിരുന്നു. പഞ്ചാബിൽ കോൺഗ്രസ് പ്രവർത്തകരെ കൂട്ടത്തോടെ പാർട്ടിയിൽ എത്തിച്ചത് പോലെ ഗുജറാത്തിൽ ബിജെപി പ്രവർത്തകരെ പാർട്ടിയിൽ എത്തിക്കാമെന്ന കെജരിവാളിന്റെ മോഹമാണ് തിരിഞ്ഞു കൊത്തിയിരിക്കുന്നത്.
2022 ഡിസംബറിലാണ് ഗുജറാത്തിൽ നിയമസഭാ തെരഞ്ഞെടുപ്പ്. 182 അംഗങ്ങളുള്ള നിയമസഭയിൽ 99 സീറ്റുകൾ നേടി ബിജെപിയാണ് നിലവിൽ ഭരണം നടത്തുന്നത്.
