ഇന്ത്യയില്‍ നിരത്തിലിറങ്ങുന്ന എല്ലാ പാസഞ്ചര്‍ കാറുകളിലും ആറ് വീതം എയര്ബാഗുകള് നിര്‍ബന്ധമാക്കാനുള്ള നീക്കവുമായി കേന്ദ്ര സര്‍ക്കാര്‍. ചില കാര്‍ നിര്‍മ്മാതാക്കളില്‍ നിന്ന് ഇതിനെതിരെ പ്രതിഷേധം ഉയര്‍ന്നിരുന്നു. കാര്‍ നിര്‍മ്മാണച്ചെലവ് ഉയരുമെന്നാണ് അവരുടെ വാദം. എന്നാല്‍ ജനങ്ങളുടെ സുരക്ഷയാണ് സര്‍ക്കാരിനെ സംബന്ധിച്ചിടത്തോളം മുഖ്യമെന്ന് ഒരു മുതിര്‍ന്ന സര്‍ക്കാര്‍ ഒഫീഷ്യല്‍ വാര്‍ത്താ ഏജന്‍സിയായ റോയിട്ടേഴ്സിനോട് പറഞ്ഞു. “സുരക്ഷയുടെ കാര്യത്തില്‍ യാതൊരു വിട്ടുവീഴ്ചയ്ക്കും തയ്യാറല്ല. നിയമം നടപ്പിലാക്കുന്നതുമായി ബന്ധപ്പെട്ട അന്തിമഘട്ട ചര്‍ച്ചകളിലാണ് സര്‍ക്കാര്‍. അധികം വൈകാതെ തന്നെ തീയതി പ്രഖ്യാപിക്കും,” അദ്ദേഹം വ്യക്തമാക്കി.
ഒക്ടോബര്‍ ഒന്നിന് ശേഷം പുറത്തിറങ്ങുന്ന എല്ലാ കാറുകളിലും ആറ് എയര്ബാഗുകള് വേണമെന്ന് കേന്ദ്രസര്‍ക്കാര്‍ നേരത്തെ ഉത്തരവ് പുറപ്പെടുവിച്ചിരുന്നു. യാത്രക്കാര്‍ക്ക് നാല് എയര്‍ബാഗുകളും സൈഡിലോ കര്‍ട്ടനിലോ ആയി രണ്ട് എയര്‍ബാഗുകളും വേണമെന്നാണ് സര്‍ക്കാര്‍ നിര്‍ദ്ദേശിച്ചിരിക്കുന്നത്. കാര്‍ നിര്‍മ്മാണ കമ്പനികള്‍ ഈ നിര്‍ദ്ദേശത്തില്‍ അതൃപ്തരാണ്. ചെറിയ കാറുകളുടെ വില വര്‍ധിക്കുന്ന സാഹചര്യം ഉണ്ടാവുമെന്ന് ഇന്ത്യയിലെ ഏറ്റവും പ്രധാനപ്പെട്ട കാര്‍ നിര്‍മ്മാണ കമ്പനി റോയിട്ടേഴ്സിനോട് പറഞ്ഞു.
ഡ്രൈവര്‍ക്കും മുന്നിലിരിക്കുന്ന യാത്രക്കാരനും എയര്‍ബാഗ് നിലവില്‍ തന്നെ നിര്‍ബന്ധമാണ്. നാല് എയര്ബാഗുകള് കൂടി ഘടിപ്പിക്കാന്‍ 75 ഡോളര്‍ ചെലവ് വരുമെന്നാണ് സര്‍ക്കാരിന്റെ കണക്ക്. അതായത് ഏകദേശം 5735 രൂപ. എന്നാല്‍, ഓട്ടോ മാര്‍ക്കറ്റിനെക്കുറിച്ച്‌ പഠനം നടത്തുന്ന ജാട്ടോ ഡൈനമിക്സിന്റെ കണക്ക് പ്രകാരം നാല് എയര്ബാഗുകള് കൂടി ഘടിപ്പിക്കാന്‍ 231 ഡോളര്‍ ചെലവ് വരും. അതായത് ഏകദേശം 17661 രൂപ. ഇത്രയും തുക നിര്‍മ്മാണച്ചെലവ് കൂടുമ്പോള്‍ ചെറിയ കാറുകളുടെ വില വര്‍ധിപ്പിക്കേണ്ടി വരുമെന്നാണ് കാര്‍ നിര്‍മ്മാണ കമ്പനികള്‍ പറയുന്നത്. സാധാരണക്കാരായ വലിയൊരു വിഭാഗം കാര്‍ വാങ്ങുന്നതില്‍ നിന്ന് പിന്തിരിയാനുള്ള സാധ്യത തള്ളിക്കളയാന്‍ സാധിക്കില്ലെന്നും കാര്‍ നിര്‍മ്മാതാക്കള്‍ ആശങ്കപ്പെടുന്നു.
എന്നാല്‍ നിര്‍മ്മാണച്ചെലവ് വലിയ തോതില്‍ കൂടില്ലെന്നാണ് സര്‍ക്കാരിന്‍റ വിലയിരുത്തല്‍. ആവശ്യമുള്ള വസ്തുക്കള്‍ എത്തിച്ച്‌ എയര്ബാഗുകള് ഘടിപ്പിക്കുന്നതിന് സമയം ആവശ്യമാണ്. ഇത് പരിഗണിച്ചാണ് മുന്നോട്ട് പോവുന്നതെന്നും സര്‍ക്കാര്‍ വൃത്തങ്ങള്‍ വ്യക്തമാക്കി. കൂടുതല്‍ എയര്‍ബാഗുകളുള്ള കാറുകള്‍ ചില കമ്ബനികള്‍ ഇന്ത്യയിലേക്ക് ഇറക്കുമതി ചെയ്യുന്നുണ്ട്. എന്നാല്‍ ഇതേ കമ്ബനികള്‍ ഇന്ത്യയില്‍ വില്‍ക്കുന്ന കാറുകളില്‍ രണ്ട് എയര്ബാഗുകള് മാത്രമാണുള്ളത്. വില കൂടിയ വലിയ ബ്രാന്‍ഡ് കാറുകള്‍ക്ക് നിലവില്‍ തന്നെ നാല് എയര്ബാഗുകള് വരെയുണ്ട്. സാധാരണ കാറുകള്‍ക്ക് രണ്ട് എയര്‍ബാഗാണുള്ളത്.
“കാര്‍ നിര്‍മ്മാതാക്കള്‍ തന്നെ യാത്രക്കാരുടെ സുരക്ഷയെ കരുതി ആവശ്യത്തിന് എയര്ബാഗുകള് ഘടിപ്പിക്കണം. ഇത് സര്‍ക്കാര്‍ നിര്‍ബന്ധമാക്കേണ്ട കാര്യമല്ല. കാര്‍ നിര്‍മ്മാതാക്കള്‍ അത് ചെയ്യാത്തത് കൊണ്ടാണ് സര്‍ക്കാരിന് നിയമം കൊണ്ടുവരേണ്ടി വരുന്നത്,” സര്‍ക്കാരുമായി ബന്ധപ്പെട്ട വൃത്തങ്ങള്‍ വ്യക്തമാക്കി. സീറ്റ് ബെല്‍റ്റ് പോലെത്തന്നെ എയര്‍ബാഗുകളും കൂടി ആയാല്‍ രാജ്യത്തെ റോഡപകട മരണങ്ങള്‍ മൂന്നിലൊന്നായി കുറയ്ക്കാന്‍ സാധിക്കുമെന്നാണ് സര്‍ക്കാരിന്റെ പ്രതീക്ഷ.
Discussion about this post