മുംബൈ: ആഗോള ഇസ്ലാമിക ഭീകരന്‍ ദാവൂദ് ഇബ്രാഹിമിന്റെ സംഘത്തിന്റെ കേന്ദ്രങ്ങളെന്ന് സംശയിക്കുന്ന 20 കേന്ദ്രങ്ങളില്‍ റെയ്ഡുമായി ദേശീയ കുറ്റാന്വേഷണ ഏജന്‍സി. സംഘത്തിന്റെ കേന്ദ്രങ്ങളെന്ന് സംശയിക്കുന്ന നിരവധി പ്രദേശങ്ങളില്‍ ഒരേ സമയമാണ് റെയ്ഡ് തുടരുന്നത്.
ആയുധ ഇടപാട്, മയക്കുമരുന്ന്, മനുഷ്യക്കടത്ത്, ഭീകരപ്രവര്‍ത്തനം, ഹവാല എന്നിവയടക്കം നിരവധി തെളിവുകളുടെ അടിസ്ഥാനത്തിലാണ് റെയ്ഡ്. മുംബൈ ഭീകരാക്രമണത്തിന്റെ തുടര്‍ച്ചയായ അന്വേഷണമാണ് നടന്നുകൊണ്ടിരിക്കുന്നതെന്ന് എന്‍ഐഎ അറിയിച്ചു.
ദാവൂദിന്റെ സംഘമായ ഡി-കമ്പനിക്കെതിരെ വ്യാപകമായ റെയ്ഡാണ് എന്‍ഐഎ നടത്തുന്നത്. മുംബൈയിലെ 20 കേന്ദ്രങ്ങളിലാണ് അതിരാവിലെ മുതല്‍ റെയ്ഡ് നടക്കുന്നത്. ബാന്ദ്പ, നാഗ്പാഡ, ബോറിവലി, ഗോറേഗാവ്, പരേല്‍, സാന്റാക്രൂസ് എന്നിവടങ്ങളിലാണ് പ്രധാന റെയ്ഡ്. ഡി-കമ്പനിയുടെ കൊട്ടേഷന്‍ സംഘത്തിലെ ഷാര്‍പ്പ് ഷൂട്ടര്‍മാര്‍, മയക്കുമരുന്നു കടത്തുന്നവര്‍, ഹവാല ഇടപാടുകാര്‍, ഭൂമാഫിയ സംഘങ്ങള്‍ എന്നിവരടങ്ങുന്ന എല്ലാവരേയും അന്വേഷണ സംഘം തിരയുകയാണ്. ദാവൂദിന്റെ സംഘത്തിനെ കൂടാതെ, ഛോട്ടാ ഷക്കീല്‍, ജാവേദ് ചിക്ന, ടൈഗര്‍ മേമന്‍, ഇഖ്ബാല്‍ മിര്‍ച്ചി, ഹസീനാ പാര്‍ക്കര്‍ എന്നിവരുടെ സംഘത്തേയും തിരയുകയാണെന്ന് ആഭ്യന്തര വകുപ്പ് അറിയിച്ചു.
നിലവില്‍ ദാവൂദ് പാകിസ്ഥാനിലെ കറാച്ചിയിലാണെന്നാണ് നിഗമനം.
Discussion about this post