കെ ടി ജലീലിന് മുംബൈയില് ബിനാമിയുണ്ടെന്ന് സ്വപ്ന സുരേഷിന്റെ ആരോപണത്തിനെതിരെ പരിഹാസവുമായി മുന്മന്ത്രി കെ ടി ജലീല്. തിരുനാവായക്കാരന് മാധവ വാര്യരായത് നന്നായി. വല്ല കുഞ്ഞിപ്പോക്കരിന്റെയോ മറ്റോ പേര് പറഞ്ഞിരുന്നെങ്കില് കെണിഞ്ഞേനെ എന്ന് മുൻമന്ത്രി ഫേസ്ബുക്കില് കുറിച്ചു.
മുംബൈ ആസ്ഥാനമായി പ്രവര്ത്തിക്കുന്ന ഫ്ലൈ ജാക്ക് ലോജിസ്റ്റിക്സ് എന്ന സ്ഥാപനത്തിന്റെ ഉടമ മാധവന് വാര്യര് കെ ടി ജലീലിന്റെ ബിനാമിയാണെന്നായിരുന്നു സ്വപ്ന സുരേഷിന്റെ ആരോപണം. രഹസ്യമൊഴിയില് നല്കിയ സത്യവാങ്മൂലത്തിലാണ് ഇക്കാര്യം പരാമര്ശിച്ചിരിക്കുന്നത്.
സംസ്ഥാനത്തിന് പുറത്തെ കോണ്സുലേറ്റ് വഴിയും ഖുറാന് എത്തിച്ചുവെന്ന് കോണ്സല് ജനറല് വെളിപ്പെടുത്തിയിരുന്നെന്നും സ്വപ്ന പറഞ്ഞു. ഷാര്ജ ഭരണാധികാരിക്ക് ഡി ലിറ്റ് നല്കാന് ജലീല് സമ്മര്ദ്ദം ചെലുത്തി. ഇതിനായി വൈസ് ചാന്സലര് ഡോ. കെ മുഹമ്മദ് ബഷീറിനെ ജലീല് സ്വാധീനിച്ചുവെന്നും സ്വപ്ന കോടതിയില് രഹസ്യമൊഴി നല്കിയ സത്യവാങ്മൂലത്തില് വെളിപ്പെടുത്തിയിട്ടുണ്ട്.
സംസ്ഥാനത്തെ മുഖ്യമന്ത്രി പിണറായി വിജയന്, ഭാര്യ കമല, മകള് വീണ, മുന് സ്പീക്കര് പി.ശ്രീരാമകൃഷ്ണന്, ഐഎഎസ് ഉദ്യോഗസ്ഥരായ നളിനി നെറ്റോ, ശിവശങ്കര് തുടങ്ങിയവര്ക്ക് സ്വര്ണക്കടത്ത് ഉള്പ്പെടെ യുഎഇ കോണ്സുലേറ്റില് നടന്ന നീചവും നിയമവിരുദ്ധവും ദേശവിരുദ്ധവുമായ പ്രവര്ത്തനങ്ങളില് പ്രത്യേക പങ്കാളിത്തമുണ്ട്. ഇക്കാര്യം കോടതിയില് നല്കിയ 164 മൊഴിയില് പരാമര്ശിച്ചിട്ടുണ്ടെന്നും സ്വപ്ന വ്യക്തമാക്കി.
സുഹൃത്ത് നിയന്ത്രിക്കുന്ന മിഡില് ഈസ്റ്റ് കോളേജിന് ഷാര്ജയില് ഭൂമി ലഭിക്കാന് ശ്രീരാമകൃഷ്ണന് ഇടപെട്ടുവെന്നും ഇതിനായി ഷാര്ജയില് വെച്ച് ഭരണാധികാരിയെ കണ്ടു. ഒരു ബാഗ് നിറയെ പണം കോണ്സല് ജനറലിന് കൈക്കൂലി നല്കിയെന്നും സ്വപ്ന ആരോപിച്ചിട്ടുണ്ട്.
Discussion about this post