മലപ്പുറം: മലപ്പുറം ഗവണ്മെന്റ് കോളജില് നിന്നും ലക്ഷങ്ങള് വിലമതിക്കുന്ന ഇലക്ട്രിക്കല് ഉപകരണങ്ങള് മോഷണം പോയി. സംഭവവുമായി ബന്ധപ്പെട്ട് കേസിൽ എസ് എഫ് ഐ യൂണിറ്റ് സെക്രട്ടറിയും, കെഎസ് യു യൂണിറ്റ് പ്രസിഡന്റും ഉൾപ്പെടെ ഏഴ് വിദ്യാർത്ഥികളെ അറസ്റ്റ് ചെയ്തു. എസ്എഫ്ഐ യൂണിറ്റ് സെക്രട്ടറി വിക്ടര് ജോണ്സണ്, കെഎസ് യു യൂണിറ്റ് പ്രസിഡന്റ് ആത്തിഫ് എന്നിവര് ഉള്പ്പെടെ ഏഴ് വിദ്യാര്ത്ഥികളാണ് പിടിയിലായത്.
കോളേജ് പ്രിൻസിപ്പലിന്റെ പരാതിയുടെ അടിസ്ഥാനത്തിൽ നടത്തിയ അന്വേഷണത്തിനൊടുവിലാണ് അറസ്റ്റ്. ഇസ്ലാമിക് ഹിസ്റ്ററി, ഉറുദു, കെമിസ്ട്രി ഡിപ്പാര്ട്ടുമെന്റുകളിൽ നിന്നായി പതിനൊന്ന് ബാറ്ററികളും രണ്ട് പ്രോജക്ടറുകളുമാണ് കഴിഞ്ഞയാഴ്ച കാണാതായത്.
കോളേജ് പ്രിന്സിപ്പല് തിങ്കളാഴ്ചയാണ് പൊലീസിന് പരാതി നല്കിയത്. ഇതേ കോളേജില് പഠിക്കുന്ന ആറ് പേരും ഒരു പൂര്വ വിദ്യാര്ത്ഥിയുമാണ് പ്രതികള്. ഇതില് എസ്എഫ്ഐ യൂണിറ്റ് സെക്രട്ടറിയും കെഎസ് യു യൂണിറ്റ് പ്രസിഡന്റും ഉള്പ്പെടും. മോഷ്ടിച്ച ബാറ്ററികള് പ്രതികള് ആക്രിക്കടയില് വില്ക്കുകയായിരുന്നു. ആ പണം മുഴുവന് അന്ന് തന്നെ ചെലവഴിച്ചെന്നും പൊലീസ് പറഞ്ഞു. അതേസമയം മോഷണം പോയ പ്രൊജക്ടറുകൾ കണ്ടെത്തിയില്ല.
Discussion about this post