വാഷിംഗ്ടണ്: ഇന്തോനേഷ്യയിലെ ബാലിയില് നടന്ന ജി-20 ഉച്ചകോടിയുടെ പ്രഖ്യാപനങ്ങള് സംബന്ധിച്ച കൂടിയാലോചനകളില് ഇന്ത്യ സുപ്രധാന പങ്ക് വഹിച്ചെന്ന് വൈറ്റ്ഹൗസ്. വൈറ്റ്ഹൗസില് നടന്ന പതിവ് മാധ്യമ കൂടിക്കാഴ്ചയില് പ്രസ്സ് സെക്രട്ടറി കരീന് ജീന് പിയര് ആണ് ഉച്ചകോടിയില് ഇന്ത്യ നടത്തിയ നിര്ണ്ണായക ഇടപെടലുകളെ അഭിനന്ദിച്ചത്. ‘ഈ യുഗം യുദ്ധത്തിന്റേതല്ലെ’ന്ന പ്രധാനമന്ത്രി നരേന്ദ്രേമോദിയുടെ വാക്കുകളെയും വൈറ്റ്ഹൗസ് അഭിനന്ദിച്ചു.
യുക്രൈന്-റഷ്യ യുദ്ധം സംബന്ധിച്ച പരാമര്ശങ്ങളില് ഈ യുഗം യുദ്ധത്തിന്റേതായിരിക്കില്ലെന്ന് പ്രധാനമന്ത്രി നരേന്ദ്രമോദി വ്യക്തമാക്കിയതായിട്ടുണ്ടെന്നും പിയര് മാധ്യമങ്ങളോട് പറഞ്ഞു. കഴിഞ്ഞ ഫെബ്രുവരിയില് ആരംഭിച്ച യുക്രൈന്-റഷ്യ സംഘര്ഷങ്ങളായിരുന്നു ജി-20 ഉച്ചകോടിയിലെ പ്രധാന ചര്ച്ചാവിഷയങ്ങളില് ഒന്ന്. പ്രധാനമന്ത്രി നരേന്ദ്രമോദിയെ കൂടാതെ അമേരിക്കന് പ്രസിഡന്റ് ജോ-ബൈഡന്, ബ്രിട്ടീഷ് പ്രധാനമന്ത്രി ഋഷി സുനക് ഉള്പ്പടെയുള്ള ലോകനേതാക്കളും ഉച്ചകോടിയില് സന്നിഹിതരായിരുന്നു.
നിലവിലെ ഭക്ഷ്യ-ഊര്ജ്ജ സുരക്ഷ വെല്ലുവിളികളെ ഇന്ത്യയും അമേരിക്കയും ഒന്നിച്ച് അഭിമുഖീകരിച്ചതായും പ്രതിസന്ധികളില് തകരാത്ത ആഗോള സമ്പദ് വ്യവസ്ഥ പടുത്തുയര്ത്താന് ഇരുരാജ്യങ്ങളും ശ്രമിക്കുന്നതായും പിയര് പറഞ്ഞു. ‘ജി-20 ഉച്ചകോടി വിജയകരമായി പൂര്ത്തിയാക്കാന് സാധിച്ചു. മറ്റ് രാജ്യങ്ങളുമായുള്ള പ്രധാനമന്ത്രി നരേന്ദ്രനമോദിയുടെ ബന്ധങ്ങള് ഉച്ചകോടിയില് നിര്ണ്ണായകമായി’. ജി-20യുടെ അധ്യക്ഷനെന്ന നിലയില് വരുംവര്ഷം ഇന്തയ്ക്ക് പിന്തുണ നല്കുമെന്നും പിയര് വ്യക്തമാക്കി.
‘ പ്രധാനമന്ത്രിയുടെ യുദ്ധം വേണ്ട’ എന്ന സന്ദേശമാണ് ഇത്തവണ ജി-20 ഉച്ചകോടിയില് മുഴങ്ങിക്കേട്ടത്. ഉച്ചകോടി പ്രഖ്യാപനങ്ങളിലും അത് പ്രതിഫലിച്ചു. ഉച്ചകോടിയെ തുടര്ന്ന് നടത്തിയ സംയുക്ത പ്രഖ്യാപനത്തില് യുക്രൈനെതിരായ റഷ്യന് ഫെഡറേഷന്റെ ആക്രമണണങ്ങളെ ലോകനേതാക്കള് ശക്തമായി അപലപിച്ചു. യുക്രൈന്റെ അധികാരമേഖലകളില് നിന്ന് റഷ്യ പൂര്ണ്ണമായും നിരുപാധികം പിന്മാറണമെന്നും നേതാക്കള് ആവശ്യപ്പെട്ടു. യുക്രൈനില് വെടിനിര്ത്തലിന്റെയും നയതന്ത്രത്തിന്റെയും പാതയിലേക്ക് തിരിച്ചുവരുന്നതിനുള്ള വഴി കണ്ടെത്തണമെന്ന് താന് നിരന്തരമായി പറയുന്ന കാര്യമാണെന്ന് പ്രധാനമന്ത്രി നരേന്ദ്രമോദി ഉച്ചകോടിയില് പങ്കെടുക്കവേ പറഞ്ഞിരുന്നു. രണ്ടാം ലോകമഹായുദ്ധം കഴിഞ്ഞ നൂറ്റാണ്ടില് ലോകത്ത് നാശം വിതച്ചു. അതിനുശേഷം സമാധാനത്തിന്റെ പാതയിലേക്ക് ലോകത്തെ എത്തിക്കാന് അക്കാലത്തെ നേതാക്കള് അക്ഷീണം പരിശ്രമിച്ചു. ഇപ്പോള് നമ്മുടെ ഊഴമാണെന്നും പ്രധാനമന്ത്രി ലോകനേതാക്കളെ ഓര്മ്മിപ്പിച്ചു.
ഡിസംബര് ഒന്നിനാണ് ഇന്ത്യ ജി-20യുടെ അധ്യക്ഷപദം ഏറ്റെടുക്കുക.
Discussion about this post