അഹമ്മദാബാദ്: ഗുജറാത്ത് നിയമസഭാ തെരഞ്ഞെടുപ്പിന്റെ രണ്ടാംഘട്ട വോട്ടെടുപ്പ് നടക്കുന്ന ഇന്ന് പ്രധാനമന്ത്രി നരേന്ദ്ര മോദി വോട്ട് രേഖപ്പെടുത്തി. സബര്‍മതി അസംബ്ലി മണ്ഡലത്തിലെ റാണിപ്പിലുള്ള നിഷാന്‍ ഹൈസ്‌കൂളില്‍ സജ്ജീകരിച്ചിരുന്ന പോളിംഗ് സ്‌റ്റേഷനിലാണ് രാവിലെ അദ്ദേഹം വോട്ട് ചെയ്തത്.
വോട്ടെടുപ്പിനോടുള്ള ജനങ്ങളുടെ ആവേശത്തിന് നന്ദി അറിയിച്ച പ്രധാനമന്ത്രി താന്‍ വോട്ട് ചെയ്യുന്നത് കാണുന്നതിനായി തടിച്ചു കൂടിയവരെ അഭിവാദ്യം ചെയ്യുകയും ചെയ്തു. രാവിലെ 9 മണിക്ക് മുമ്പുതന്നെ വോട്ട് ചെയ്യാനായി രാജ്ഭവനില്‍ നിന്നും അദ്ദേഹം യാത്ര തിരിച്ചിരുന്നു.
2017ല്‍ വോട്ട് ചെയ്ത് അതേ ബൂത്തിലാണ് ഇത്തവണയും മോദി വോട്ട് രേഖപ്പെടുത്തിയത്. ”ജനാധിപത്യത്തിന്റെ ഉത്സവം ഗുജറാത്ത്, ഡെല്‍ഹി, ഹിമാചല്‍ പ്രദേശ് എന്നിവിടങ്ങളിലെ ജനങ്ങള്‍ ഗംഭീരമായി അഘോഷിച്ചു. രാജ്യത്തെ ജനങ്ങള്‍ക്ക് ഈ വേളയില്‍ ഞാന്‍ നന്ദി പറയുകയാണ്, നരേന്ദ്രമോദി പറഞ്ഞു. തെരഞ്ഞെടുപ്പ് സമാധാനപരമായി നടത്തുന്ന തെരഞ്ഞെടുപ്പ് കമ്മീഷനെ അഭിനന്ദിക്കാനും അദ്ദേഹം മറന്നില്ല.
മുഖ്യമന്ത്രി ഭൂപേന്ദ്ര പാട്ടീലും അഹമ്മദാബാദില്‍ വോട്ട് ചെയ്തു. കേന്ദ്ര ആഭ്യന്തര മന്ത്രി അമിത് ഷായ്ക്ക് നഗരത്തിലെ തന്നെ നാരന്‍പുരയിലാണ് വോട്ട്. ഗുജറാത്തിലെ മധ്യ, വടക്കന്‍ മേഖലകളിലായുള്ള 14 ജില്ലകളിലായി നടക്കുന്ന വോട്ടെടുപ്പില്‍ 833 സ്ഥാനാര്‍ത്ഥികളാണുള്ളത്. ഈ മാസം എട്ടിനാണ് വോട്ടെണ്ണല്‍.
Discussion about this post