ന്യൂഡെല്ഹി: കേരള ഗവര്ണ്ണര് ആരിഫ് മുഹമ്മദ് ഖാനെതിരെ ലോക്സഭയില് അടിയന്ത്ര പ്രമേയത്തിന് നോട്ടീസ്. ആലപ്പുഴ എംപിയും സിപിഎം നേതാവുമായ എ എം ആരിഫാണ് വിഷയത്തില് അടിയന്തര പ്രമേയ നോട്ടീസ് സമര്പ്പിച്ചത്. കേന്ദ്രസര്ക്കാര് ഗവര്ണ്ണറെ തിരികെ വിളിക്കണമെന്നും ഭരണഘടനയ്ക്കും ജനാധിപത്യത്തിനും എതിരായ നടപടികളാണ് ഗവര്ണറുടെ ഭാഗത്ത് നിന്നും ഉണ്ടാകുന്നതെന്നും അടിയന്തര പ്രമേയ നോട്ടീസില് പറയുന്നു.
സംസ്ഥാന സര്ക്കാരിനെ വെല്ലുവിളിക്കുന്ന പ്രവര്ത്തനങ്ങളാണ് ഗവര്ണര് കേരളത്തില് നടത്തുന്നത്. പരസ്യമായ രാഷ്ട്രീയപ്രവര്ത്തനമാണ് അദ്ദേഹം നടത്തുന്നതെന്നും ബിജെപി നേതാക്കള്ക്കെതിരായ കേസുകള് പിന്വലിക്കണമെന്നാവശ്യപ്പെട്ട് ഗവര്ണ്ണര് മുഖ്യമന്ത്രിക്ക് കത്ത് നല്കിയതായും നോട്ടീസില് ആരോപിക്കുന്നു. ഗവര്ണ്ണര് കാരണം കേരളത്തിലെ സര്വ്വകലാശാലകളുടെ പ്രവര്ത്തനം തകരാറിലായെന്നും നോട്ടീസില് കുറ്റപ്പെടുത്തുന്നുണ്ട്.
