കൊച്ചി: നെടുമ്പാശേരി വിമാനത്താവളത്തില്‍ വീണ്ടും സ്വര്‍ണക്കടത്ത്. ചെറിയ ബട്ടണിന്റെ രൂപത്തിലാക്കിയ സ്വര്‍ണ്ണം ട്രോളി ബാഗില്‍ ഒളിപ്പിച്ച് കടത്താന്‍ ശ്രമിക്കുമ്പോഴാണ് അധികൃതരുടെ ശ്രദ്ധയില്‍ പെട്ടത്. തുടര്‍ന്നുള്ള അന്വേഷണത്തില്‍ മുഹമ്മദ് എന്നയാള്‍ പിടിയിലായതായി കസ്റ്റംസ് അറിയിച്ചു. ഇയാള്‍ കാസര്‍കോട് സ്വദേശിയാണ്.
ദുബായിയില്‍ നിന്നും നെടുമ്പാശേരി വിമാനത്താവളത്തിലെത്തിയ മുഹമ്മദ് ട്രോളി ബാഗിന്റെ പിടി ഭാഗത്ത് നാല് ബട്ടന്‍സുകളിലായാണ് സ്വര്‍ണം ഒളിപ്പിച്ച് കടത്താന്‍ ശ്രമിച്ചത്. ഇയാള്‍ ട്രോളിയില്‍ നിന്നും കൈയ് എടുക്കാതെ നിന്നതിനെ തുടര്‍ന്ന് ഉദ്യോഗസ്ഥര്‍ വിശദമായി പരിശോധിച്ചതോടെ സംഭവം പുറത്താവുകയായിരുന്നു. നാല് ചെറിയ ബട്ടന്‍സുകളിലായി 140 ഗ്രാം സ്വര്‍ണ്ണമാണ് കസ്റ്റംസ് ഇയാളുടെ പക്കല്‍ നിന്നും കണ്ടെടുത്തത്.
