തിരുവനന്തപുരം: കഴിഞ്ഞ ദശാബ്ദങ്ങളില് ഇന്ത്യയില് ആയിരക്കണക്കിന് മരണങ്ങള്ക്ക് കാരണമായ മാരകമായ താപ തംരംഗങ്ങള് ഭയപ്പെടുത്തുന്ന രീതിയില് വര്ധിച്ച് കൊണ്ടിരിക്കുകയാണെന്ന് ലോകബാങ്ക്. മനുഷ്യന് സഹിക്കാവുന്ന പരിധിക്ക് മുകളിലുള്ള താപ തംരംഗങ്ങള് അനുഭവിക്കേണ്ടി വരുന്ന ലോകത്തിലെ ആദ്യ ഇടങ്ങളിലൊന്നായി ഇന്ത്യ ഉടന് മാറുമെന്നും ലോകബാങ്കിന്റെ ഏറ്റവും പുതിയ റിപ്പോര്ട്ട് മുന്നറിയിപ്പ് നല്കി.
ഇന്ത്യയിലെ ശിതീകരണ മേഖലയിലെ കാലാവസ്ഥ നിക്ഷേപ സാധ്യതകള് എന്ന പേരിലുള്ള ലോകബാങ്ക് റിപ്പോര്ട്ടിലാണ് രാജ്യം അധികം വൈകാതെ കടുക്ക ചൂടിലേക്ക് നീങ്ങുമെന്നും ദീര്ഘകാലം ഇന്ത്യക്ക് അത് സഹിക്കേണ്ടി വരുമെന്നും പറയുന്നത്.
ലോകബാങ്കും കേരള സര്ക്കാരും ചേര്ന്ന് സംഘടിപ്പിക്കുന്ന ഇന്ത്യ കാലാവസ്ഥ, വികസന പങ്കാളിത്ത സമ്മേളനത്തില് ഈ റിപ്പോര്ട്ട് പുറത്തുവിടും. ഈ വര്ഷം ഏപ്രിലില് ന്യൂഡെല്ഹില് 46 ഡിഗ്രി സെല്ഷ്യസ് താപനിലയാണ് അനുഭവപ്പെട്ടത്. മാര്ച്ചില് അസാധാരണമായ നിലയില് താപനില വര്ധിച്ചു. ഇതുവരെ രേഖപ്പെടുത്തിയതില് ഏറ്റവും ഉയര്ന്ന താപനിലയായിരുന്നു അന്നത്തേത്, റിപ്പോര്ട്ടില് പറയുന്നു.
ഇന്ത്യയിലെ താപ തംരംഗ സാഹചര്യം മനുഷ്യന് സഹിക്കാവുന്ന പരിധിക്കും അപ്പുറം കടക്കുമെന്ന പ്രവചനവും റിപ്പോര്ട്ടിലുണ്ട്. ദക്ഷിണേഷ്യയില് ഉടനീളം താപനില വര്ധിച്ചുകൊണ്ടിരിക്കുകയാണെന്ന കാലാവസ്ഥ ശാസ്ത്രജ്ഞരുടെ മുന്നറിയിപ്പുകളെ പിന്താങ്ങുന്ന പ്രവചനമാണ് ലോകബാങ്ക് നടത്തിയിരിക്കുന്നത്. വരും ദശാബ്ദത്തില് ഇന്ത്യന് ഉപഭൂഖണ്ഡം അടിക്കടിയുള്ള, ശക്തമായ താപ തംരംഗങ്ങള് അനുഭവിക്കേണ്ടി വരുമെന്ന് ഐപിസിസി (ഇന്റെര്-ഗവണ്മെന്റല് പാനല് ഓണ് ക്ലൈമറ്റ് ചെയ്ഞ്ച്)യുടെ ആറാമത് റിപ്പോര്ട്ട് മുന്നറിയിപ്പ് നല്കിയിരുന്നു.
Discussion about this post