ന്യൂഡെല്ഹി: ഏഷ്യ കപ്പ് 2023യില് മത്സരിക്കാന് ഇന്ത്യന് ടീം പാക്കിസ്ഥാനിലേക്ക് പോകില്ലെന്ന കാര്യം ഏറെക്കുറേ ഉറപ്പായി. മത്സരത്തില് പങ്കെടുക്കാന് ടീം ഇന്ത്യ പാക്കിസ്ഥാനിലേക്ക് പോകില്ലെന്ന ബിസിസിഐ നിലപാട്, ബിസിസിഐക്കും പിഎസ്ബി(പാക്കിസ്ഥാന് ക്രിക്കറ്റ് ബോര്ഡ്)ക്കും ഇടയില് കൊമ്പുകോര്ക്കലുകള്ക്ക് ഇടയാക്കിയതിന് പിന്നാലെ ഈ വിഷയത്തില് ഇന്ത്യയുടെ നിലപാട് ഒന്നുകൂടി വ്യക്തമാക്കിയിരിക്കുകയാണ് വിദേശകാര്യ മന്ത്രി എസ് ജയ്ശങ്കര്. അതിര്ത്തി കടന്നുള്ള തീവ്രവാദത്തിനെതിരെ ശക്തമായ താക്കീത് നല്കിയ ജയ്ശങ്കര് ഇരുരാജ്യങ്ങളും തമ്മിലുള്ള ക്രിക്കറ്റ് ബന്ധത്തില് സര്ക്കാരിന്റെ നിലപാട് വ്യക്തമാക്കുകയും ചെയ്തു.
“ടൂര്ണമെന്റുകള് വന്നുകൊണ്ടേയിരിക്കും, ഇക്കാര്യത്തില് സര്ക്കാറിന്റെ നിലപാട് നിങ്ങള്ക്ക് അറിയാവുന്നതാണ്. എന്താണ് സംഭവിക്കുന്നത് നോക്കാം. അത് വളരെ സങ്കീര്ണമായ വിഷയമാണ്. നിങ്ങളുടെ തലയില് ഞാന് തോക്ക് വെച്ചാല് പിന്നെ നിങ്ങള് എന്നോട് സംസാരിക്കുമോ? നിങ്ങളുടെ അയല്ക്കാര് പരസ്യമായി തീവ്രവാദത്തിന് സഹായം നല്കുകയും നേതാക്കന്മാര് ആരൊക്കെയാണെന്നും ക്യാംപുകള് എവിടെയാണിന്നും വ്യക്തമായി അറിയുമ്പോള് അവരോട് ഇടപെടുമോ? അതിര്ത്തി കടന്നുള്ള തീവ്രവാദം സാധാരണമാണെന്ന് നാം ഒരിക്കലും കരുതുന്നില്ല. ഒരു രാജ്യത്തിനെതിരെയുള്ള ഭീകരവാദത്തിന് അയല്രാജ്യം സ്പോണ്സര് ചെയ്യുന്ന മറ്റൊരു ഉദാഹരണം ചൂണ്ടിക്കാണിക്കാന് പറ്റുമോ. അത്തരമൊരു ഉദാഹരണം എവിടെയും ഇല്ല. ഒരു തരത്തില് പറഞ്ഞാല് ഇത് വെറും അസാധാരണമെന്നല്ല, സമാനതകളില്ലാത്തതാണ്”. അജണ്ട ആജ് തകില് എസ് ജയ്ശങ്കര് വ്യക്തമാക്കി.
ഇന്ത്യന് ടീം തങ്ങളുടെ രാജ്യത്ത് വരാത്തത് കൊണ്ട് ടൂര്ണമെന്റുകള്ക്ക് ആതിഥേയത്വം വഹിക്കാനുള്ള തങ്ങളുടെ അവകാശങ്ങള് എടുത്തുകളഞ്ഞാല് ഏഷ്യ കപ്പ് 2023ല് നിന്ന് പിന്മാറുന്ന കാര്യം ആലോചിക്കുമെന്ന് പിസിബി അധ്യക്ഷന് റമീസ് രാജ ഈ മാസം ആദ്യം വ്യക്തമാക്കിയിരുന്നു. ഏഷ്യ കപ്പ് നിഷ്പക്ഷമായ വേദിയിലായിരിക്കും അരങ്ങേറുകയെന്ന് മത്സരത്തില് പങ്കെടുക്കാന് ടീം ഇന്ത്യ പാക്കിസ്ഥാനിലേക്ക് പോകുമോ എന്ന സംശയങ്ങള് പൂര്ണമായും തള്ളിക്കൊണ്ട് ബിസിസിഐ അധ്യക്ഷന് ജയ് ഷ വ്യക്തമാക്കിയിരുന്നു. 2012ലാണ് ഇതിന് മുമ്പ് ഇന്ത്യയും പാക്കിസ്ഥാന് ഉഭയകക്ഷി സിരീസുകള് കളിച്ചത്.
‘ക്രിക്കറ്റില് നമ്മുടെ നിലപാട് എന്താണെന്ന് നിങ്ങള്ക്ക് അറിയാം. ഭീകരവാദത്തെ സ്പോണ്സര് ചെയ്യാന് ഒരു രാജ്യത്തിന് അവകാശനമുണ്ടെന്നതിനോട് തങ്ങള് ഒരിക്കലും യോജിക്കുന്നില്ല. നിയമപ്രകാരം അതിനെ എതിര്ത്തില്ലെങ്കില്, അത് തുടര്ന്നുകൊണ്ടേയിരിക്കും. അതിനാല് പാക്കിസ്ഥാന് മേല് ഒരു ആഗോള സമ്മര്ദ്ദം വരണം. ഭീകരവാദത്തിന്റെ ഇരകള് സ്വയം അതിനെതിരെ ശബ്ദം ഉയര്ത്തിയില്ലെങ്കില് അത്തരമൊരു സമ്മര്ദ്ദം ഉണ്ടാകുകയില്ല. ഇന്ത്യ അതിന് മുന്നിട്ടിറങ്ങും കാരണം നമ്മുടെ രക്തമാണ് ചിന്തിയത്,’ ജയ്ശങ്കര് വ്യക്തമാക്കി.
ഏഷ്യ കപ്പില് പങ്കെടുക്കാന് ഇന്ത്യ പാക്കിസ്ഥാനിലേക്ക് വരില്ലെങ്കില് ഐസിസി ലോകകപ്പില് പങ്കെടുക്കാന് പാക്കിസ്ഥാനും ഇന്ത്യയിലേക്ക് വരില്ലെന്ന് റമീസ് രാജ ഭീഷണി മുഴക്കിയിട്ടുണ്ട്.
Discussion about this post