കൊൽക്കത്ത: വിനോദസഞ്ചാരത്തിനും നിക്ഷേപത്തിനും പറ്റിയ ആകർഷണീയമായ രാജ്യമാണ് ഇന്ത്യയെന്ന് ഈജിപ്ഷ്യൻ ധനകാര്യ വകുപ്പ് സഹമന്ത്രി ഷെറിൻ എൽ ഷർകാവി. ഇന്ത്യ അവസരങ്ങളുടെ കലവറയാണ്. വിവര സാങ്കേതിക രംഗത്തെ ഇന്ത്യയുടെ പുരോഗതി അനുകരണീയമാണെന്നും അവർ പറഞ്ഞു.
നിരവധി സംസ്കാരങ്ങൾ ഒരുമിച്ച് ചേരുന്ന രാജ്യമാണ് ഇന്ത്യ. വിനോദസഞ്ചാര രംഗത്ത് സമാനതകളില്ലാത്ത സാദ്ധ്യതകളാണ് ഇന്ത്യക്ക് ഉള്ളത്. വ്യവസായങ്ങൾക്ക് പറ്റിയ അന്തരീക്ഷമാണ് ഇന്ത്യയിലുള്ളതെന്നും എൽ ഷർകാവി വ്യക്തമാക്കി.
ജി20 സമ്മേളനത്തിന് മുന്നോടിയായി ഇന്ത്യയിലെത്തിയതായിരുന്നു ഈജിപ്ഷ്യൻ മന്ത്രി. ഇന്ത്യയുടെ ആതിഥ്യ മര്യാദകൾ മികച്ചതാണെന്ന് അവർ പറഞ്ഞു. ഇന്ത്യ അതിവേഗം വികസിച്ചു കൊണ്ടിരിക്കുന്ന രാജ്യമാണെന്ന് ഇവിടെ വരുന്ന ഏതൊരു വിദേശിക്കും ബോദ്ധ്യപ്പെടുമെന്ന് അവർ കൂട്ടിച്ചേർത്തു.
ഇന്ത്യയും ഈജിപ്തും തമ്മിലുള്ള ബന്ധം ചിരപുരാതനവും ചരിത്ര പ്രസിദ്ധവുമാണ്. സംസ്കാരത്തിലും ഭക്ഷണത്തിലും സംഗീതത്തിലും ആചാരങ്ങളിലും ഇരു രാജ്യങ്ങളും തമ്മിൽ സമാനതകൾ ഏറെയാണ്. ഇരു രാജ്യങ്ങളും തമ്മിലുള്ള ബന്ധം ഇനിയും ശക്തിപ്പെടുത്തേണ്ടതുണ്ടെന്നും അവർ അഭിപ്രായപ്പെട്ടു.
Discussion about this post